AEB Amerikako Estatu Batuek Iran hegoaldea erasotu dute goizaldean, eta urratu egin dute apirilaren 8an ezarritako su etena. Tim Hawkins AEBetako Komando Zentraleko buruak ziurtatu du erasoak «haien buruak babesteko» egin dituztela, eta helburu zutela «Irango mehatxuen aurrean» tropa estatubatuarrak babestea. «Minak jartzen saiatzen ari ziren ontziei eta misil baseei» egin diete eraso. Su etena indarrean denetik, bigarren bonbardaketa handia izan da goizaldekoa.
Teheranen arabera, Irango Guardia Iraultzaileko lau kide hil dituzte bonbardaketetan.
Hawkinsen esanetan, «neurriz» jokatzen ari da armada bi herrialdeen artean indarrean den su etenaren baitan. Hain zuzen, erasoen ondoren ere, Marco Rubio AEBetako Estatu idazkariak adierazi du su etena ez dela bertan behera gelditzen, eta posible dela oraindik bi aldeak ados jartzea.
Erasoak negoziazioak hastera zirenean egin ditu Washingtonek. Irango Legebiltzarreko bozeramailea atzo bertan heldu zen Qatarrera, elkarrizketak hasteko asmoz. Zenbait iturriren arabera, harekin batera dira Abbas Araghtxi Irango Atzerri ministroa eta Irango Banku Nazionaleko buru Abdolnaser Hemmati.
Hemmati Qatarrera joan izanak negoziazioen inguruko zurrumurruak piztu ditu, AEBek blokeatuta dituzten Iranen ondasunak askatzeko prest ote den Washington.
