Ekialde Hurbilean geratzekoak dira momentuz AEBetako armadak hantxe dituen hiru hegazkinontziak eta dozena bat gerraontzi. The Wall Street Journal egunkariak iturri ofizialak aipatuz kaleratu duenez, Donald Trumpek balaztaren bi aldeetan jarri ditu, batetik, apirilaren 13an ezarri zuten Irango portuen blokeoari eustea, eta, bestetik, erasoei berriro heltzea, islamiar errepublikak beren baldintzak onartu ditzaten; presidenteak, oraingoz behintzat, irizten dio bonbardaketek «arrisku handiagoa» ekarriko luketeela —gogoratzekoa da, Iranek nola erantzun zion otsailaren 28an AEBek eta Israelek ekindako erasoaldiari, baita eskualdeko energia azpiegituren kontra jaurti zituen misilak ere—, eta, ondorioz, bere gertukoei eskatu die «prestatu» daitezela itsasontzien blokeoa luzatzeko.
AEBetako ontzidia apirilaren 8an su etena adostu eta bost egunera hasi zen Irango portuetara doazen edo horietatik datozen ontziak gerarazten, ikusita Teheranek ez zuela eten Ormuzko blokeoa —gatazka areagotu zenean, Irango Guardia Iraultzaileak itsasarte estrategiko horren kontrola hartu zuen bere gain, eta tregoa ezarri eta egun batzuk geroxeago ireki egingo zuela iragarriagatik ere, 24 ordu ere ez dituelako egin irekita—. Atzo arte, AEBetako armadak 39 ontziri galarazi die Ormuz zeharkatzea, eta bi petroliontzi atzeman ditu Indiako ozeanoan, argudiatuta harremana dutela Iranekin.
Informazio gehiago, berehala.
