Israelgo Segurtasun Publiko Ministerioak jakinarazi duenez, Israelek erraztasunak emango dizkiei Palestinako kolonietan bizi direnei armak izan ditzaten. Horretarako armak izatea eskatu dutenen zerrenda gainbegiratzen ari dira, eta kolonoak lehenetsiko dituzte. Orain arte eskaera egindako ordenean aztertzen zituzten eskaerak.
"Herritar bat arriskua duen lurralde batean bizi denean, ezin du beste lurralde batean bizi den herritar batek bezala erantzun", esan dute agintariek. Neurri horrekin Zisjordaniako eta beste lurralde okupatu batzuetako kolonoak armatzea erraztuko du. Otsailean Zisjordaniako kolonoek ez zietela armak izaten uzten salatu zuten, eta Parlamentuan eskandalua sortu zen.
