Israelek 39 pertsona hil ditu Gazan gaur, Al-Jazeera hedabideak zerrendako osasun iturriak aipatuz kaleratu duenez. Errefuxiatuen esparruei, etxebizitza blokeei eta laguntza humanitario guneei egin die eraso Israelgo armadak. 2023ko urrian Gazako setioa hasi zuenetik, gutxienez 57.575 palestinar hil ditu Israelek, Gazako iturri ofizialen arabera.
Horrekin lotuta, Muhammad Abu Salmiyak, Al-Xifa ospitaleko zuzendariak, Al-Jazeera hedabideari adierazi dio osasun zentroa «egoera larrian» dagoela. Zerrendan ez dute nahikoa erregai, eta, ondorioz, zentroa itzalaldi arriskuan dago, eta ZIUetan eta ebakuntza geletan ezinbestekoak diren makinak itzaltzen ari dira. Abu Salmiyak ohartarazi du orain duten erregaiak 24 ordu baino gutxiago iraungo duela, eta egoerak horrela jarraituz gero ehunka pertsona hiltzeko arriskuan daudela. Hori jakinik, NBE Nazio Batuen Erakundeko bozeramaileak Gazan erregaia berehala sartzen uzteko eskatu zuen atzo.
2.500Zenbat gorpu dauden berreskuratu gabe Gazan. Gazako Osasun Ministerioaren arabera, zerrendako hondakinen artean 2.500 gorpu daude. Iristeko zailak diren lekuetan daude hilotzak, eta ezin izan dituzte berreskuratu.
AEB Ameriketako Estatu Batuetako presidente Donald Trump eta Israelgo lehen ministro Benjamin Netanyahu Washingtonen bildu ziren, berriro, atzo; 24 orduan bigarrenez. Astelehenekoa ez bezala, aurrez iragarri gabeko elkarrizketa izan zen atzokoa. Kazetariak ezin izan ziren bileran egon, eta, Etxe Zuriko iturrien arabera, gai bakarraz aritu ziren: Gazako su-eten proposamenaz.
Trumpekin izandako hizketaldia amaitzean, Netanyahuk sare sozialetan adierazi zuen «Hamasek Gazan bahitutakoak askatzeko ahaleginetan» ari direla. «Helburu guztiak lortzeko prest» daudela esan zuen Israelgo lehen ministroak, eta «Iranen aurka lortutako garaipen handiaren ondorioez eta aukerez» hitz egin zutela.
Bitartean, Zisjordanian, bederatzi etxebizitza eraitsi eta bi nekazaritza eremu hondatu ditu Israelek Ramallahn, Jerusalemen eta Nablusen, eta gutxienez 30 palestinar atxilotu —tartean 9 urteko bi haur— , Wafa Palestinako berri agentziak jakinarazi duenez. Urte hasieratik, 588 eraikin suntsitu ditu, eta 843 pertsona etxegabetu; horien artean, 411 adingabe. Epe berean, beste 556 eraikin eraisteko aginduak ere eman ditu Israelek.
Israelek libano hegoaldeari eraso dio
Israelgo armadak Libano hegoaldeari eraso egin dio goizaldean, eta Hezbollahko goi kargudun bat hil duela iragarri du: Hussein Ali Muzhir. «Husseinek eraso ugari egin zituen Israelgo Estatuaren eta armadaren aurka, eta duela gutxi Hezbollahk Libano hegoaldean artilleria ezartzeko egindako saiakeretan parte hartu zuen», azpimarratu du armadak. Informazio horren arabera, Israelentzat, milizianoaren ekintzak 2024ko azaroan Libanorekin sinatutako su etenaren «urraketa nabarmena» dira.
Bestalde, Al-Jazeera hedabideak azaldu duenez, Israelgo armadak ohar batean zabaldu du Libano hegoaldean Hezbollahren aurkako operazio militarrak egin dituela. Milizia xiitaren arma gordelekuak jotzea lortu duela ere esan du Israelek.
