Estatu Batuetako Estatu Departamentuaren arabera, Israelgo eta Libanoko ordezkariek su etena 45 egun luzatzea hitzartu zuten atzo gauean Washingtonen. Hala ere, Israelgo armadak hiru mediku hil ditu Libano hegoaldean.
Atzo bukatzen zen Israelek eta Libanok apirilean adostu zuten su etena; hori dela eta, bi herrialdeetako ordezkariek bi eguneko negoziazioak izan zituzten Estatu Batuetako Estatu Departamentuan. Hala ere, Israelek hainbat aldiz hautsi du su etena, eta ehunka libanoar hil ditu apirilean menia hitzartu zutenetik.
Su etenaz gain, ordezkariek akordatu zuten «militar mailako» bilera bat egingo dutela Pentagonoan maiatzaren 29an, Bestalde, bake negoziazioak egingo dituzte ekainaren 2an eta 3an.
Libanoko ordezkaritza Nada Hamadeh Estatu Batuetako libanoar enbaxadoreak eta Simon Karam berriemaile bereziak osatu zuten; Israelgoa, ordea, Yechiel Leiter Estatu Batuetako israeldar enbaxadoreak eta Yossi Draznin Segurtasun Nazionaleko aholkulariordeak osatu zuten. AEBen aldetik, Michael Needham Estatu Departamenduko aholkulariak, Mike Huckabee Israelgo estatubatuar enbaxadoreak eta Michel Issa Libanoko estatubatuar enbaxadoreak parte hartu zuten.
«Espero dugu eztabaida horiek aurrera egitea bi herrialdeen arteko bake iraunkorra lortzeko, subiranotasuna eta lurralde osotasuna erabat onartzeko, eta benetako segurtasuna ezartzeko beren muga komunean zehar», adierazi zuen Tommy Pigott AEBko Estatu Departamentuko bozeramaileak sare sozialetan.
Hiru hildako Libanon
Israelek su etena luzatzea hitzartu duen arren, armadak hiru mediku libanoar hil eta bat larri zauritu ditu. Libano hegoaldeko Harouf herrian dagoen Osasun Agintaritza Islamiarraren sorospen erakunde bati eraso egin zioten soldadu israeldarrek eta eraikina suntsitu egin dute, Libanoko Osasun Publikoko Ministerioak azaldu duenez.
Gainera, sei osasun langile zauritu ditu Israelek Tiron. Tiro herriko mediku zentro bat bonbardatu dute militarrek; eta eraikin hori suntsitzeaz gain, ondoko ospitaleari «kalte material esanguratsuak» eragin dizkiote. Bertan zeuden zauritutako sei langileak.
Martxoaren 2tik ehun osasun langile baino gehiago hil ditu Israelgo armadak anbulantziei, mediku zentroei eta larrialdietako taldeei egindako erasoengatik.
