Joe Biden AEB Ameriketako Estatu Batuetako presidenteorde ohiak aise irabazi ditu Alderdi Demokrataren primarioak Hego Carolinan, %48,4ko babesarekin. 255.320 boto eta 31 ordezkari lortu ditu. Bernie Sanders bigarren geratu da, Bidenek lortutako babesaren erdira ere iritsi gabe (%19,9): 104.984 boto eta hamar ordezkari.
Emaitza horiek ikusita, Bidenek adierazi du «askoz ere biziago» daudela orain: «Azkenaldian, hedabideek hiltzat jo zuten kanpaina hau. Alderdi Demokrataren bihotzari eskerrak, irabazi egin dugu, eta ondo irabazi, gainera».
Tom Stever enpresaria izan da hirugarrena. 59.729 pertsonak bozkatu dute haren alde (%11,3), eta dagoeneko esana du ez duela jarraituko Alderdi Demokrataren hautagai izateko lehian. Haren atzetik geratu dira Pete Buttigieg (%8,2) eta Elizabeth Warren (%7,1).
Hego Carolinako primarioak berebiziko garrantzia duen aste baten atarian egin dituzte, asteartean hautatuko baitituzte Alderdi Demokrataren ordezkarien herenak. Astearte Handia esaten diote: primarioak egingo dituzte Kalifornian, Texasen, Ipar Carolinan, Virginian, Massachusettsen, Minnesotan, Coloradon, Tennesseen, Alabaman, Oklahoman, Arkansasen, Utah-n, Mainen, Vermonten eta Samoa Estatubatuarrean.
