Hondakin nuklearren behin betiko biltegia hartuko duen toki baten bila dabil Espainiako Gobernua irailetik, Asco Kataluniako herriko Udalak hautagaitza aurkeztu du (Tarragonan dago), baina segituan eman du Kataluniako Gobernuak kontrako erantzuna, Jose Montilla (PSC) Generalitateko presidenteak biltegiaren aurkako gutuna bidaliko diolako Miguel Sebastian (PSOE) Espainiako Industria ministroari.
Josep Lluis Carod Rovira (ERC) Generalitateko presidenteordeak eman du Montillaren neurriaren berri, gaur. "Arlo nuklearrean elkartasun kuota beteta dugu", adierazi du Carod Rovirak.
Ascoko Udalak gaur hartu du hautagai izateko erabakia, udalbatzarrean: aldeko zazpi boto, kontrako bi. Kataluniako Gobernuak ez du helegiterik sartuko, baina gaiak udalerria gainditzen duela dio eta berak horretaz hitz egin nahi duela. "Adostasun soziala eta lurraldeen artekoa eskatzen du, eta gaur egun halakorik ez dago", esan du Carod Rovirak. PSC eta ERCz gain, ICV ere badago gobernuan.
Espainiako Gobernuak irailean zabaldu behar zuen deialdia, biltegia hartzeko prest dauden herriek hautagaitzak aurkezteko. Biltegia hartuko lukeen herriak diru sarrera handiak jasoko lituzkeela nabarmendu izan du gobernuak: zerga bidez, urtero hamabi milioi euro.
Ascon bertan zentral nuklearra dago.
munDUA
Kataluniako Gobernua, hondakin nuklearren behin betiko biltegia hartzearen aurka
Tarragonako udal batek gaur aurkeztu du hautagaitza -Ascok-, baina Jose Montilla Generalitateko presidenteak egitasmoaren kontrako gutuna bidaliko dio Miguel Sebastian Espainiako Industria ministroari.
Iruzkinak
Ez dago iruzkinik
Ordenatu
