Alberto Carrasquilla Kolonbiako Ogasun ministroak kargua utzi du bart, horrela istiluak baretuko direlakoan. Dagoeneko sei egunez ari dira herritarrak protestan kalean, Ivan Duque presidentearen Gobernuak ezarri nahi zuen zerga erreformaren kontra. Kolonbiako Herri Defendatzailearen arabera, 19 pertsona hil dira dagoeneko, eta 800 zauritu.
Carrasquilla 2018tik zegoen agintean, eta hura izan da huts eginiko zerga erreformaren protagonista nagusietako bat. Gobernuak BEZa eta bestelako zerga ez-progresiboak handitu nahi zituen, izurriak estatuaren kutxetan eragindako zuloa estaltzeko. Horrek langileen eta erdiko klase haserrea eragin du.
Carrasquilla ordezkatzeko, Jose Manuel Restrepo izendatu du presidenteak Ogasun ministro. Orain arte, Merkataritza, Industria eta Turismo ministroa izan da Restrepo.
Azken egunetako protestek behartuta, gobernuak atzera bota du ezarri nahi zuen zerga erreforma, baina harago doaz manifestarien eskariak. Gizarte erakundeek, ikasleek, sindikatuek eta kolektibo indigenek deia egin zuten atzo Cali hirian protesta egiteko. «Bataila bat irabazi dugu zerga erreforma atzera botatzeko gobernuaren erabakiarekin, baina ez dugu borroka irabaziko lan erreforma, osasun erreforma eta pentsio erreforma biltzen dituen Duqueren paketea atzera bota arte eta hildakoei, zauritutakoei eta harrapatutakoei justizia egiten zaien arte», adierazi zuten ohar batean.
Hildako eta zaurituez gain, protesten deitzaileek jakinarazi zuten bost lagun desagertuta daudela, seik begia galdu dutela eta emakume bat bortxatu dutela istiluen aurkako agenteek. Segurtasun indarren bortizkeria gogor salatu dute manifestariek azken egunetan, baina egoeraren larritasuna haien bizkar utzi du Ivan Duque presidenteak, eta, gainera, militarrak kalera bidaltzea erabaki zuen larunbatean, protestei aurre egiteko.
Pandemiak utzitako zulo ekonomikoari buelta emateko neurri arranditsu gisa aurkeztu zuen Duquek zerga erreformaren proiektua, eta, horren bidez, estatuko finantza publikoak 5.220 milioi euro baino gehiagorekin diruztatuko zirela hitzeman zuen; besteak beste, zerbitzu publikoei %19ko BEZa ezarrita. Oposizioa eta herritarrak gainera etorri zitzaizkion, ordea, eta presio horrek proposamena atzera botatzera behartu zuen. «Kontsentsuen fruitu» izango den beste proiektu bat lehenbailehen garatzen hastea da haren asmoa orain.
Eredu ekonomikoen arteko talka azalarazi dute protestek, eta oligopolioen eta enpresa handien mesedetan aritzea leporatzen diote manifestariek gobernuari. Egiteko modu horren ordezkaritzat dute Alberto Carrasquilla Ogasun ministroa, eta haren ministerioan sortutakoa da atzera bota duten zerga erreforma. Horregatik, protesten jomugan dago, eta dimisioa eskatzen ari zaizkio herritar asko.
