Konstituzio aldaketa iragarri du Aljeriako presidenteak karguari eusteko

Abdelaziz Buteflika 72 urteko Aljeriako agintariak iragarri du hurrengo udaberriko hauteskundeen ondoren boterean jarraitu ahal izateko Konstituzio erreforma egiteko asmoa. Aljeriako lege bilduma gorenak orain arte eragotzi egiten zuen bi agintaldi baino gehiago boterean izatea, eta hori aldatu nahi du Buteflikak, «herriak aukera izan dezan nahi dituen agintariak hautatzeko». Alderdikideek eta Ahmed Uiahia lehen ministroak eskatu zioten urrats hori egiteko. Halaber, presidentearen boterea indartu nahi du Buteflikak proposatutako hiru aldaketekin. 1999an hartu zuen agintea, eta 2004ko bozetan gehiengo handiaz irabazi zuen.