Artur Mas Generalitateko presidenteak gogor kritikatu ditu gaur goizean Linderen hitzak. Independentziaren kontrako "intoxikaziotzat" jo ditu adierazpenok, eta "beldurraren estrategian" ez erortzeko eskatu die katalanei. Gaineratu du independentzia adostu ezean, Kataluniaren zorrarekin geratuko dela Espainia, eta garesti aterako litzaiokeela: "Nola egingo lioke aurre zor horri Katalunian zati bat bere gain hartzea adosten ez badu?".
Aurretik Lindek ziurtatu du Katalunia independentearekin "corralito" arriskua dagoela. Haren arabera, prozesua burura eramanez gero Katalunia Europako Batasunetik eta Eurotik "automatikoki" aterako litzateke, eta ezingo luke Europako Banku Zentralaren dirurik jaso. Adibide gisa, Grezia eta Hego Amerikako kasuak jarri ditu. Era berean, ostiralean Espainiako bankuek argitaratutako oharra defendatu du.
