Milaka kurdu atera dira kalera Ocalanen atxiloketaren urteurrenean

Milaka lagun atera ziren atzo Turkiako eta Turkiaren mendeko Kurdistango 40 hiritako kaleetara, Abdullah Ocalan presoaren atxiloketaren hamahirugarren urteurrenagatik protesta egitera.Ocalan askatu!, Eutsita irabaziko dugu! eta Behera otsailaren 15eko konspirazioa! oihukatu zituzten manifestariek, besteak beste. PKK Kurdistango Langileriaren Alderdiaren sortzaile eta burua da Ocalan. Bizi guztiko kartzela zigorra du Ocalanek, eta Imrali uhartean daukate espetxeratua, Marmara itsasoan. 1999an atxilotu zuten Nairobin, eta handik Turkiara bidali zuten.

Istanbulen manifestazioa egiteko saioa egin zuten ehunka lagunek, hiriaren erdiguneko Taksim plazan; tartean, BDP Bakearen eta Demokraziaren Alderdi kurduko diputatu batzuk. Baina ez zuten lortu, Poliziak gerarazi egin baitzituen eta 30 lagun atxilotu baitzituen. Diyarbakir Turkiaren menpeko Kurdistango hiri nagusian, berriz, Poliziak negar eragiteko gasak eta ura presio handiz jaurtitzen duten ibilgailuak erabili zituen kaleetan bildutako milaka manifestarien aurka. Kurdistango hiri batzuetan, gainera, gose greba hasi dute Ocalanen jarraitzaile batzuek, haren egoera salatzeko.

Hiru egun, 431 atxilotu

Atzoko egunez gutxienez 89 lagun atxilotu zituen Turkiako Poliziak, Ocalan askatzearen aldeko manifestazioetan. Hala ere, aurreko egunetan ere nabarmen egin du gora atxiloketen kopuruak. Azken hiru egunetan, 431 lagun atxilotu ditu Poliziak, AKP Justizia eta Garapenerako Alderdiaren gobernuak abiatutako «terrorismoaren kontrako borroka» izenekoaren barruan. Otsailaz geroztik, 635 lagun atxilotu dituzte, eta azken 46 egunetan, berriz, 1.522. ANF eta DIHA berri agentziek pilatu dituzte atxiloketen datuak.

PKK-k 1984. urtean ekin zion Turkiako Estatuaren aurkako borroka armatuari. Ankarak ez ditu kurduak herri gisa onartzen, eta jazarpena erabiltzen du euren kontra. 40.000 lagun inguru hil dira gatazkaren ondorioz.