Unifil Nazio Batuen Libanorako Indar Behin-behinekoak Ekialde Hurbileko herrialde horretan jarraitzea onartu du gaur NBE Nazio Batuen Erakundeko Segurtasun Kontseiluak. Urtero berritu izan du kasko urdinen misio hori, eta datorren urte amaierara arte egongo da Libanon. Hortik aurrera, tropa horiek herrialdea utzi beharko dute urtebeteko epean; erretiratze «ordenatua eta segurua» izango da, gaur onartu duten ebazpenaren arabera, eta Libanoko armadaren esku geratuko da herrialdearen hegoaldean «segurtasuna» bermatzea. Ia bost hamarkadako misioaren ostean, Segurtasun Kontseiluko AEBetako ordezkariak betetzat jo du NBEren misioa, Libanoko Gobernuak hango armadari berriki agindu diolako herrialdeko arma guztiak «kontrolpean» izatea urte amaierarako.
Frantziak aurkeztu du Unifil misioa luzatzeko lege proposamena, eta kontseiluko kideek aho batez egin dute haren alde. Efe agentziak Segurtasun Kontseiluko iturriak aipatuz kaleratu duenez, AEBak tematuta zeuden misioa amaitzearekin, besteak beste NBEren misio militarretarako jarritako dirua murrizteko; eta, bide batez, Israelek ere egin du presio nazioarteko tropak handik atera ditzaten, kontseiluko kideen artean ez dagoen arren. Unifilek «porrot» egin duela adierazi du gaur Israelek NBEn duen enbaxadoreak: «Libanoko Gobernuak du ardura eremuaren kontrola hartzeko eta ulertzeko han egon behar duela. Ez Hezbollahk, ez inork». Herrialde horretako Atzerri Ministroak beso zabalik hartu du erabakia, eta nabarmendu du, ohar batean, kasko urdinak erretiratzea «egokia» dela eta on egingo diola «eskualdeko egonkortasunari».
Joseph Aoun Libanoko presidentea, bestalde, fio da eskualdean egonkortasuna «sendotuko» dela Unifileko tropak joan aurretik. Haren bulegoak ohar bat kaleratu du, eta «muga guztietan» Libanoren subiranotasuna berresteko deia egin du.
Unifil 1978an ezarri zuten Libanoko hegoaldean, Israelen eta Hezbollahren zein bestelako talde armatuen arteko erasoaldietan eremu horretan egonkortasuna bermatzeko xedez; alegia, batetik, Tel Avivek tropak erretiratu dituela ziurtatzeko, eta, bestetik, miliziak armagabetzen laguntzeko. Segurtasun Kontseiluan onartu duten ebazpenak berretsi egin du Israelen armadako tropak lerro urdina izenekoaren hegoaldera eramateko agindua: NBEk de facto ezarri zuen bi herrialdeen arteko muga hori 2000. urtean, 1982tik ordura arte Israelek Libano hegoaldea okupatu eta gero.
Lau hamarkada pasatxoan lau gerra piztu dira Israelen eta Libanoko milizien artean: 1978an, 1982an, 2006an, eta, azkena, Hezbollak erasoekin erantzun zionean Israelek Gazan ekin zion setioari, 2023ko urrian —iazko azaroan sinatu zuten su etena bi herrialdeek—.
