Israelek ez du NBEko bake indarrek Libanon esku hartzerik nahi
Egoera, entrenamendu hobea izan duten tropek kontrolatu behar luketela uste du Dan Gillerman NBEren Segurtasun Kontseiluan Israelek duen enbaxadoreak, ez NBEko bake indarrek. Hori dela-eta, baztertu egin zuen atzo NBEko bake indarrek Libanon esku-hartzea eta uste du hobe litzatekeela nazioarteko indar profesional bat bidaltzea. Gillermanek gaineratu zuen ez diola baimenik emango NBEri bere begiraleen heriotza eragin zuen Israelgo Armadaren erasoa ikertzeko. Bien bitartean, erasoaldiaren hamazazpigarren egunean Israelgo Armadak 130 helburu libanoar bonbardatu ditu. Hezbolak ere, katyusha kohete ugari jaurti ditu Israel iparraldeko herrien aurka.
"Israelek ez du sekula hitzartu elkarren arteko ikerketa bat, eta ez dut uste AEBetan, Erresuma Batuan, Italian edo Frantzian zerbait gertatuko balitz nor bere gobernuak elkarren arteko ikerketa bat onartuko lukeenik", adierazi zuen Israelgo enbaxadoreak New Yorkeko NBEren egoitzan.
Gillermanen hitzetan 1978tik Libano eta Israelen arteko mugan hedatuta dauden NBEko behin behineko bake indarrek ez dute beren lana ondo egin. Izan ere, adierazi zuen kasko urdinen eraikuntzak Hezbolako ekintzaileek erabili izan dituztela eta NBEko bake indarren lana ez dela eraginkorra izan. "Inoiz ez dira gai izan Israelen aurkako bonbardaketak saihesteko, edo eraso terroristak, edo bahiketak. Ez dute ikusi edo ez dute ikusi nahi izan. Baina alferrikakoak izan dira", azpimarratu du. Gillermanek txatxetarako gogoa ere izan zuen atzo eta NBEko 'aldi baterako' indarrei buruz hitz egin zuen. "Behin behineko, NBEren hiztegian, 28 urte dira", azaldu zuen.
Arrazoi horiek direla medio, Gillermanen iritziz NBEko indarrek ez dute gaitasunik Libanoko egoera kontrolpean mantentzeko. "Ezin du NBEko indar bat izan. Nazioarteko indar profesional bat izan behar du". Nazioarteko indar horrek Hezbola armagabetzea lortu beharko du. Eta gainera, "Siria eta Libanoren arteko muga gainbegiratuz" armak batetik bestera ez bidaltzea kontrolatu beharko du.
Hamazazpigarren egunez Libano bonbardatzen
Tiro hiria izan da gaur Israelgo Armadako hegazkinen jomuga nagusia. Gutxienez, erasoaldia abiatu zutenetik hamazazpigarren eguna den 130 helburu libanoar bonbardatu dituzte gaur israeldarrek. Antza denez, Hezbolak Tirotik egiten dio eraso Israel iparraldeko Haifa hiriari.
Erasoaldi horiek baina ez dute eragotzi Hezbolak katyusha misilak jaurtitzea. Israel iparraldeko hainbat herritan koheteen soinuarekin esnatu dira gaur. Lekukoek azaldu dute goizeko zortziak inguruan, besteak beste, Haifa, Carmiel, San Juan de Acre hirietako alarmak piztu direla. Baita ekialderago dauden beste batzuk ere. Oraingoz ez dute hildako edo zaurituen berri eman.
ekialde hurbila
NBEk Libanoren eta Israelen arteko mugatik 50 begirale erretiratzea erabaki du
Libanoren eta Israelen arteko mugan begiraleak ditu NBE Nazio Batuen Erakundeak. Ez dute armarik, eta NBEak 50 begirale handik erretiratzea erabaki du. Nazioarteko erakundeko ordezkari batek jakinarazi duenez, bake indarrak dauden gunera lekualdatuko dituzte. Hain zuzen ere, asteazkenean NBEko lau begirale hil zituen Israelgo Armadak eraso batean. Mugako lau postutan banatuta UNIFILeko (Libanora bakea jartzeko asmoz bideratutako segurtasun indarra) 50 begirale daude, horietako bi hustu dituzte dagoeneko.
Iruzkinak
Ez dago iruzkinik
Ordenatu
