Ordezkarien Ganberarako eta Senaturako hauteskundeak

Alderdi Demokratak AEB Ameriketako Estatu Batuetako Kongresuan gehiengo handia ziurtatu nahi du bi ganberetako ordezkariak aukeratzeko gaur egingo dituzten hauteskundeetan. Ordezkarien Ganberan 2006ko bozetan lortu zuen Alderdi Errepublikanoari irabaztea, eta oraingoan aldea handitzea du helburu. Senatuan, bestalde, egungo indar parekotasuna apurtzeko aukera dute demokratek. Inkesten arabera, litekeena da AEBetako Kongresuko bi ganberetan Alderdi Demokratak gehiengo osoa izatea. Ordezkarien Ganberako diputatu guztiak hautatuko dituzte gaur; senatarien herenak, bestalde;34 estatutan bana. Horietatik hamabi demokratak ziren orain arte, eta 22 errepublikanoak.

Gobernadoreak hautatuko dituzte hamaika estatutan

Delaware, Indiana, Missouri, Montana, New Hampshire, Ipar Carolina, Ipar Darkota, Utah, Vermont, Washington eta Mendebaldeko Virginia estatuetan gobernadoreak aukeratuko dituzte gaur. Orain 50 estatuetatik 28 estatutan gobernadore demokratak dituzte; 22tan, errepublikanoak.

153 milioi

Hautesleak. Hemezortzi urtetik gorako AEBetako herritarren %73,5ek hauteskundeetan bozkatu ahal izateko izena eman dute, 153 milioik orotara. Inkesten arabera, gaurkoan parte-hartze errekorra izango da, eta 130 eta 135 milioi herritar artean joango dira botoa ematera.

McCainen garaipena ezustea litzateke apustu etxeentzat

AEBetako presidentetzarako bozen gainean apustua egiteko aukera ematen dute nazioarteko hainbat apustu etxek. Denentzat ustekabekoa litzateke John McCain hautagai errepublikanoak irabaztea. Hala, norbaitek McCainen alde dirua jokatu, eta hark irabaziko balu, sei aldiz biderkatuko luke jarritako kopurua.