Palestine Action taldeko sei aktibistak urtebete baino gehiago pasatu dute behin-behinean espetxean, lapurreta delitua egotzita, astungarri batekin. Erresuma Batuko auzitegi batek, baina, absolbitu egin zituen atzo arratsaldean.
2024ko abuztuaren 6an, ekintzaile horiek indarrez sartu ziren esparru militarreko Israelgo enpresa baten egoitzan, Bristolen —Elbit Systems UK du izena—, Ingalaterra mendebaldean, eta, batek izan ezik, gainontzeko akusatuek epaimahaiaren aurrean aitortu zuten baimenik gabe sartu zirela eta txikitu egin zutela enpresako ekipamendua, droneak eta ordenagailuak barne.
Fiskaltzaren arabera, ekintzaileen asmoa izan zen «ahalik eta kalterik handiena eragitea eta enpresaren informazioa lortzea». Ministerio publikoak epaiketan argudiatu duenez, ekintzaileek mazoekin eraso egin zieten segurtasun zaintzaileei, haiek atxilotzen saiatu zirenean.
Defentsaren esanetan, ordea, aktibisten asmoa zen «indarkeriarik ez erabiltzea» eta Israelgo armadarekin loturiko enpresa hori «armagabetzea». «Mazoak ez ziren armak, armagabetze sinbolikorako tresnak baizik». Enpresa horrek ukatu egiten du Israelgo armadarekin lotura duenik.
Deliberatzen 36 ordu pasatu ondoren, Woolwicheko Koroaren Auzitegiko epaimahaiak ez zuen epai bat adostu, eta, orduan, aktibistak aske geratu ziren. Kontuan hartu behar da Erresuma Batuko Gobernuak talde hori debekatu zuela iazko uztailean. Erresuma Batuko legediaren arabera, behin-behineko kartzelaldia sei hilabetekoa izan daiteke gehienez; aktibistek, baina, urtebete baino gehiago igaro dute espetxean.
