Lapurreta handi bat izan da gaur goizean Parisko Louvre museoan, munduko bisitatuenean. Rachida Dati Frantziako kultura ministroak jakinarazi duenez, goizeko 9:30ean, museoa ireki berritan, hiru lagunek Napoleon Bonaparteren eta Josefina enperatrizaren bildumako bederatzi pieza ostu eta ihes egitea lortu dute. Ez da zauriturik izan.
Lapurrak bi motorretan iritsi dira museora, eta karga jasogailu bat erabili dute zuzenean Apolo Galeriara heltzeko, bitxiak zeuden tokira. Obrak egiten ari dira Sena ibaiaren alboko inguru horretan. Kaputxadunek motozerra txikiak zituzten, eta horiekin hautsi dituzte leihoak. Bi barrura sartu dira, eta hirugarrenak kanpoaldean itxaron du. Ekintzak zazpi minutu inguru iraun ditu, eta, itxura guztien arabera, ondo planifikatuta zuten.
Sortako bederatzi pieza lapurtu dituzte, baina ikertzaileak argitzen ari dira oraindik zenbateko balioa eraman duten denera. Dena den, Laurent Nuñez Frantziako Barne ministroak aurreratu du bitxi horien balioa «kalkulaezina» dela.
Le Parisien egunkariaren arabera, museoaren kanpoaldean topatu dute lapurtutako piezetako bat, Eugenia enperatrizaren koroa. Itxuraz, hautsi egin da lapurrak ihesean ari zirela.
Dati ministroak adierazi du lapurrak profesionalak direla: «Museoak gaur egungo kriminalitate modu berrietara egokitu behar ditugu; antolatuak dira, profesionalak, lasai sartzen dira eta lau minutuan altxorra eramateko gai dira indarkeria erabili gabe».
Lapurretaren berri izandakoan, bisitari guztiak atera dituzte museotik eta jakinarazi dute gaur itxita egongo dela, egun osoan. Louvrek zortzi milioi bisitari baino gehiago jasotzen ditu urtean.
