Els segadors Kataluniako ereserkia abesten eta «president» oihu artean hartu dute gaur Carles Puigdemont Generalitateko buru erbesteratua Sardiniako Alghero hirian. Espainiako auzitegien aginduz atxilotu eta libre geratu zen atzo.
Katalanez mintzo den Sardiniako eskualdeko hiriburua da Alghero, eta han egitekoa den Nazioarteko Folk Jaialdia zen Puigdemonten helburua. Azkenean, atxiloketak ez du bisitaren zioa zapuztu, eta, kontrara, oihartzun handiagoa eman dio.
Izan ere, uharteko agintariekin bildu da Puigdemont gaur goizean. Christian Solinas Sardiniako gobernuburuarekin eta L'Alguerreko alkate Mario Conocirekin elkartu da. Conocik udaletxearen atarian hartu du Puigdemont. «Gora Katalunia askea», oihukatu dute hainbat herritarrek une horretan. Presidente erbesteratuak adierazpen laburra egin du: «Ohituta nago Espainiaren jazarpenarekin, baina azkenean beti berdina da: libre naiz».
🗣ï¸Â "Estic acostumat a ser perseguit per Espanya, però el final és sempre el mateix: sóc lliure"
— VilaWeb (@VilaWeb) September 25, 2021
Declaracions de Puigdemont abans d'entrar a l'Ajuntament de l'Alguer https://t.co/HDwryfZgPW
Arratsaldean dira uhartera heltzekoak Pere Aragones Generalitateko egungo presidentea eta presidenteorde Jordi Puignero.
Hirurak Algheroko erdialdera bisita egitekoak dira gaur, 17:30etatik aurrera, eta ordubete geroago prentsaurrekoa emango du erbesteraturiko politikariak.
