Oriol Junqueras ERCko buruak Marta Roviraren hautagaitzaren alde egin du, iragarriz errepublikak "emakume izena" izango duela. Espetxetik gutuna igorri die alderdiko kideei, eta gogorarazi die PPk eta PSCk euren helburua ez lortzea dela abenduaren 21eko bozetara aurkezteko arrazoia. Bozak irabaztekotan lehendakaria Rovira izatearen alde azaldu arren, Puigdemont eta kointseilari guztiak ere beraien hautagaiak direla berretsi du: "Argi eta ozen esan nahi dut hauteskunde hauetan Carles Puigdemont presidentea ere badela gure hautagaia, eta baita gobernu osoa ere, kontseilari guztiak, bai Bruselan daudenak eta baita preso gaudenak ere".
Gutunean, autokritika ere egin du Junquerasek. "Uste izan genuen Europako Batasunak ez zuela onartuko PPren gobernuak, Espainiaren batasunaren izenean, herritarren eta Kataluniako instituzioen aurka egitea", aitortu du Generalitateko bigarrenak alderdikideei bidalitako gutun batean. Bertan aitortzen du beharrezkoa dela autokritika egitea, baina, aldi berean, egindako lanaz "harro" egoteko arrazoiak badaudela dio.
Ez da lehen aldia ERCk autokritika egiten duena. Alderdiko bozeramaile Sergi Sabriak onartu zuen aste hasieran herritarren segurtasuna jarri zutela ororen buru, baina ez zutela aurreikusten jakin Espainiak hartu zuen jarrera "autoritarioaren" nolakoa.
