Espainiako Gobernuak 155. artikulua aplikatuko duela jakin ostean, Puigdemontek legebiltzarrari eskatu zion osoko bilkura egin eta aurrera begira nola jokatuko duen erabakitzeko. Turullek berretsi du aste honetan egingo duela osoko bilkura hori legebiltzarrak, eta hark erabakiko duela. Baina, urriaren 1ean herritarrek emandako mandatua betetzeko bidean hartuko du erabakia legebiltzarrak, bere arabera. Eta ez du deituko huteskundeetara.
RAC 1 irratian egin dioten elkarrizketan "legetik kanpo" jartzea egotzi dio Turullek Espainiako Gobernuari. "Katalunia Legebiltzarrak erabakitzen duena izango da, hura da herritarren ordezkari zilegia. Ez da izango beste batzuek nahi dutena". Duintasun instituzional kontua ere badela esan du.
Espainiak "demokratikoki aukeratutako instituzioei estatu kolpea" egin diela salatu du Turullek, eta Europako agintariei ere adi begiratzeko eskatu die: "Honek Europaren baloreei eragiten die".
