Hilabete barru egingo dituzte hauteskundeak Korsikan. Boz horietatik irteten den gobernuak lurralde berri bat kudeatuko du; izan ere, egun bi departamentutan eta lurralde batean banatutako eremua kolektibitate bakarrean batuko da.
Oraindik kanpaina bera ere hasi ez den arren, nazionalistak dira faborito boz horiek irabazteko, batez ere autonomista eta independentistek akordioa erdietsi eta zerrenda bakarrean aurkeztuko direla jakinarazi ostean. Adierazgarria da ere kanpainarako aukeratu duten leloa: Herrialde bat eraikitzen.
Nazionalistak izan ziren nagusi uhartean duela bi urte egin ziren udal bozetan, eta eurenak dira lurraldeak dituen lau diputatuetatik hiru ere. Hala, Korsikako Gobernuak sostengua helarazi dio Generalitateari, eta "zilegitasuna" aitortu dio hark hasitako prozesuari. Ondorioz, oposizioak ohartarazia du Korsikak eziin diola jarraitu Kataluniak hasitako bideari.
