Noiz sortua: 2012-08-15 00:30:00

Elizaren ondasunak (II). Lege ikuspegia

Elizgizonak funtzionario

Hipoteka Legeko artikulu batean oinarrituta ari da Eliza ondasunak bere izenean jartzen: elizgizon baten paper bat aurkeztea aski du

Frankismo aldiko arauek ematen diote bide hori, eta Aznarrek zabaldu egin zuen 1998an

Garikoitz Goikoetxea -

2012ko abuztuak 15
Estatu akonfesionala da Espainia legez, baina Eliza katolikoak legeetan bertan ere badu tratu berezia. Ondasunak bere izenean jartzeko, ez du gainerako herritarrek eta elkarteek adina betebehar. Azken batean, aski du elizgizon batek agiri bat egitea: ziurtagiri bat egin dezake, esanez ondasun bat Eliza katolikoari dagokiola, eta, beraz, jartzeko bere izenean erregistroan. «Ez dago zalantzarik pribilegio bat dela. Eliza beste pertsona bat gehiago da, eta, inolako funtsezko arrazoirik gabe, oso onuragarri duen abantaila berezi bat ematen zaio, gainerakooi ematen ez zaiguna», ohartarazi du Mikel Karrerak. Zuzenbide irakaslea da, EHU Euskal Herriko Unibertsitatean.

Hipoteka Legean eta ondorengo arauetan dago arazoa. Frankismo aldiko legea da, XX. mende hasierako lege bat oinarri duena; indarrean dago oraindik, hala ere. «Kontuan izan behar da arau hori ezarri zenean Estatua eta Eliza hertsiki lotutako erakundeak zirela», azaldu du Karrerak. Bi salbuespen zeuzkan Francoren garaiko legeak: jabari publikoko tokiak —plazak, errepideak, trenbideak...— eta gurtzarako lekuak. Zergatik? Jorge Otadui Nafarroako Unibertsitateko (Opusena) irakaslearen azalpena: «Elizak ez zeukan horiek erregistratu beharrik, ulertzen baitzen gizakien salerosketatik kanpo zeudela eta bistan zegoela Elizaren jabetza».

Hori ez zen pribilegioa, haren ustez. «Ez dago horrelakorik; izatekotan ere, pribilegio faltsua litzateke. Elizak ezin zituen bere izenean jarri bere ondasunak, eta horrek segurtasunik ez izatea zekarren alde juridikotik».Etxeak eta lursailak jarri zituen bere izenean aldi horretan; Gipuzkoan, adibidez, elizak dauden orubeak.

Abantaila gehiago

Espainiako Gobernuak 1998an aldatu zuen hori, Jose Maria Aznar presidente zela, dekretu batekin: elizak, ermitak eta horrelakoak ere immatrikulatzeko aukera jarri zuen. Egoera bideratu zuen, Opusen unibertsitateko maisuaren ustez: «Konponbide hori jarri zioten egoera hari, eta arrazoiak bazituzten, arrazoi historikoak».

Ondasunak immatrikulatu egiten ditu Elizak. «Horrek ez du esan nahi jabetza eskuratzen denik. Nolabait esateko, jabe itxura hartzen da», azaldu du EHUko irakasleak. Indarra hartzen du Elizak eraikin horrekiko. «Jabea hura ez dela esaten duenak frogatu egin beharko du beste norbait dela. Azken batean, jabea dela frogatu gabe, eraikinaren jabetzat joko da apezpikutza». Eraikina saltzeko bidea zabalik du, horrenbestez.

Frogetan dago aldea. Ondasun bat erregistratzeko, herritarrek frogak eman behar dizkiote epaileari edo notarioari, jabetza egiaztatzeko. Elizak, ez: «Zuzenean apezpikuak bere buruari ziurtagiria egin, diru kosturik gabe, eta momentuan immatrikula dezake». Salbuespeneko bidea da. «Bide berezi hori administrazio publikoak ere badu. Kontua da Elizari ere administrazio publikoari ematen zaion trataera berdina ematen zaiola», ohartarazi du Karrerak.

Eliza ez da etekina lortzen ari, Otaduiren ustez: «Ez da ondarea ebasten ari». Baina bistakoa da pribilegioak dituela. «Konponbide hori eman zaio, eta, aizu, inork ez du aurka egin. Konstituzionalak ezer esan arte, legezkoa da».

Bihar: Elizaren ondasunak, ikuspegi historikotik erreparatuta.

Albiste gehiago

Apirilaren 1ean eguneratua, 14:00etan. ©BERRIA

Koronabirusaren azken datuak

Berria

Euskal Herrian 9.358 gaixok eman dute positibo koronabirusaren proba eginda. 501 hil dira. COVID-19 gaitza izandako 2.134 pertsonari eman diete alta. Grafikoak, albiste barruan.

Aceros Olarra enpresako sarrera, Basaurin. / ©Marisol Ramirez, Foku

14.364 langabe gehiago Hego Euskal Herrian

Berria

Bataz bestean %9tik gora handitu da langabezia Hego Euskal Herrian. Nafarroako datua nabarmentzeka da: %9,96 handitu da herrialdean, eta, ondorioz, 3.600 langabe gehiago daude.

Haur bat etxeko leihotik kanpora begira. ©CABALAR / EFE

Kalea behar, barrua husteko

Amaia Ramirez de Okariz Kortabarria

Itxialdi honek jokabide aldaketa eragin dezake autismoa duten zenbait pertsonarengan, eta, hori baretzeko, kalera irteteko baimena dute. Halere, familia batzuek herritarren kexak jasan dituzte.

Langilerik gabeko obra bat, asteartean, Elgoibarren. ©Jagoba Manterola / Foku

Martxoan, 14.364 langabe gehiago Hegoaldean

Iker Aranburu

Aldi baterako kontratua zutenak izan dira krisiaren lehen kaltetuak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna