Albistea entzun

Lan gaixotasunak zenbatzean huts egiten duela aitortu du Osalanek

Zazpi minbizi kasu «soilik» aurkitu izana datu txarra dela onartu du, eta gaixotasunak azaleratzea erronkatzat jarri du Osalanek

2012an, beharrean gertatutako istripuen kopuruak %13 egin zuen behera
Juan Maria Aburto eta Izaskun Urien, atzo, Bilbon.
Juan Maria Aburto eta Izaskun Urien, atzo, Bilbon. JON HERNAEZ / ARGAZKI PRESS

Lander Muñagorri Garmendia -

2013ko irailak 21 - Bilbo

«Zenbat eta lan gaixotasun gehiago erregistratu, orduan eta hobeto irudikatzen da errealitatea». Pablo Uriarte Osalaneko zuzendariordearen hitzei datuen babesa falta izan zitzaien atzo. Izan ere, Osalanek 2012. urtean erregistratu zituen lan istripu eta gaixotasunen txostena aurkeztu zuen Izaskun Urien zuzendariak, Juan Mari Aburto Enplegu sailburuarekin batera. Eta, txostenaren arabera, lan gaixotasunen erregistroak %8 egin zuen behera urtebetean. Hau da, 2011ko 3.011 lan gaixotasunen erregistrotik iazko 2.788ra igaro da joan den urteko errealitatea. Jakitun zen, ordea, datuen babesik gabe esan zituela hitzok, eta, horregatik, laneko segurtasun eta osasunerako erakundeak etorkizunean «erronka» hori duela nabarmendu zuen. Okerra

, ordea, zuzentzeko bidean jarri dute 2013. urteko lehen zortzi hilabeteetan. 1.909 gaixotasun profesional bildu ditu orain arte Osalanek, duela urtebete baino %1 gehiago. Hala ere, oraindik handiagoa da joan den urtean atzera egin zuen ehunekoa.

Eskaini zituen datuak ez zuen zuzendariordea bera ere konbentzitu. «Deigarria da minbiziak eragindako horren gaixotasun profesional gutxi egotea 2012an». Txostenean zazpi kasu besterik ez da agertzen, eta horietatik sei amiantoaren eraginez sortutakoak dira. «Ezinezkoa da zenbatu direnak baino kasu gehiago ez egotea Euskadi osoan». Lan gaixotasunen esparruan zer hobetua badutela onartu zuen, era horretan. «Batez ere, biriketako eritasunetan». Horretarako, ezkutuan dauden gaixotasunak azaleratu beharraz mintzatu zen, «lan eritasun gehienak ez baitira behar bezala deklaratzen». Eta hori horrela izan ez dadin, gizarteko eragile guztiak arduradunak direla gogorarazi zuen: enpresa, enpresarioa, langile, sindikatu eta gainerako eragileak.

Osalanek joan den urtean erregistratu zituen eritasunak, gainera, 2011. urtean baino larritasun handiagoa izan zuten. Proportzioan gaixotasun profesionalaren ondorioz gaixo baimena hartu behar izan zuten behargin gehiago egon baitziren Bizkai, Gipuzkoa eta Araban. Sektoreka, industrian izan zuen eraginik handiena; zehazki, siderurgia, ehungintza edo egurgintzan. Horien artean, gihar eta hezurretako gaitzek eragin zuten erregistro gehien. Hala ere, lesio mota horiek azken bost urteetan «etengabe» jaisten aritu direla nabarmendu gura izan zuen Uriartek.

Istripu kopuruak ere, behera

Lan gaixotasunen erregistroaren beherakada albiste txar gisa eman bazuten, ezbeharren beherakadaren berri beste jarrera batekin eman zuen Aburto sailburuak: «Bide onetik goaz, nahiz eta azken egun hauetan hori esatea zaila izan den». Era horretan gogoan izan zituen azken hiru asteetan hil diren sei langileak. Gaurdaino zendutako 19 behargin zenbatu ditu Osalanek. «Gure helburua zenbateko hori zerora ahalik eta gehien inguratzea da», Aburtoren arabera. Baina 2012an ez zen halakorik gertatu, 29 langileren heriotza zenbatu baititu erakundeak. Datua positiboki hartu zuen sailburuak, 2011an denetara 38 behargin hil zirelako. Denetara, %24ko jaitsiera egon da urtebetean. Beherakada egon arren, datu horiek ez zituen onargarritzat jo Aburtok: «Autokonplazentziak alde batera utzi, eta lanean jarraitu beharra daukagu prebentzioaren esparruan».

Osalanek emandako datuak, ordea, sindikatuen zenbaketarekin alderatuta guztiz bestelakoak dira. ELAk urte hasieran egindako txostenaren arabera, beharrean hil ziren 66 langile zenbatu zituen, eta LABen arabera, datu hori 61era iritsi zen. Sindikatuen datuekiko dagoen alderaketari begiratu gabe, istripuen jaitsiera begi bistakoa dela esan zuen sailburuak, eta hori «gure enpresetan prebentzioa nagusitzen ari delako da».

Heriotzak eragiten dituzten lan istripuak daturik lazgarrienak dira, baina lan esparruan bestelako ezbehar gehiago ere izaten dira. Eta horiek ere behera egin dutela azpimarratu gura izan zuen Aburtok. Lanaldian baja eragin zuten 25.307 istripu gertatu ziren joan den urtean, 2011n baino 4.807 gutxiago. Ezbeharren tasa hiru lurraldeetan jaitsi dela esan zuen Urienek, eta 2012an 2000. urteaz geroztik izandako beherakadarik handiena izan dela nabarmendu gura izan zuen: %13ko jaitsiera. Datuak positibotzat jo zituen, are gehiago, 2008tik 2012ra istripu tasa, batez beste, %11,6 jaitsi delako urtero.

Eta aurtengo datuek ere joera horri eusten diotela nabarmendu zuen. Izan ere, abuztura arte bildu dituzten datuen arabera, laneko istripuek %7,3 egin dute behera. «Joera horri heldu beharra diogu, laneko istripuak ahal bezainbeste desagerrarazteko», esan zuen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arantxa Tapia Ekonomiaren Garapenerako sailburua, atzo. ©IREKIA

Jaurlaritzak «masiboki» bultzatu nahi du energia berriztagarria

Julen Otaegi Leonet

Energia berriztagarrietarako trantsizioa bizkortu behar dela uste du Jaurlaritzak, eta hala eskatu dio Espainiako Gobernuari Industriaren energia kontsumoak murrizteko, ezinbestekotzat jotzen du Madrilek bat egitea eskakizun horrekin.

XXI. mendeko apostolua

XXI. mendeko apostolua

Jokin Sagarzazu

Bere ondasun guztiak ekintza filantropikoetarako erabiliko dituela berretsi du Bill Gatesek: izurriteen kontra egiteko, munduko gosea amaitzeko, klima aldaketari aurre egiteko. Haren fundazioaren egitasmoak, baina, auzitan daude aspalditik.

Gudongeko petrolio planta, Txinako Dongying probintzian dago. ©WU HONG / EFE

Petrolioa, atzeraldiaren usainean

Imanol Magro Eizmendi

Upelak bi aste daramatza 100 dolarretik behera, eta Ukrainako gerra hasi zeneko prezioan dago
Bill Gates, 2018an Berlinen emandako hitzaldi batean. ©KAMIL ZIHNIOGLU, EFE

XXI. mendeko apostolua

Jokin Sagarzazu

Bere ondasun guztiak ekintza filantropikoetarako erabiliko dituela berretsi du Bill Gatesek: izurriteen kontra egiteko, munduko gosea amaitzeko, klima aldaketari aurre egiteko. Haren fundazioaren egitasmoak, baina, auzitan daude aspalditik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...