Europako hauteskundeak. Kanpaina

Margallok dio Europan betoa jarriko dietela Espainiatik banatzen diren herrialdeei

Espainiako Atzerri ministroak ohartarazi du estatu txikiek «arazo gehiago» dituztela krisi ekonomikoetan
Margallo Espainiako ministroa, EAEko PPko kideekin, atzo.
Margallo Espainiako ministroa, EAEko PPko kideekin, atzo. G. ESTRADA / EFE

Erredakzioa -

2014ko maiatzak 16
Europatik kanpo, eta krisialdi ekonomikoei aurre egiteko arazo gehiagorekin. Hala geratuko lirateke Espainiatik banatzea erabakiko luketen herrialdeak, Jose Manuel Margallo Espainiako Gobernuko Atzerri ministroaren ustez. Banatzeko aukera —«ez eskubidea»— izan badutela uste duen arren, Margallok «argi» utzi du estatu sortu berriek ez luketela nazioartearen onespenik jasoko, «erreferendum inkonstituzional batetik sortuak liratekeelako». «Kanporatuak ez, lehen unetik kanpoan egongo lirateke, Batasuneko estatu kideek ez dituztelako inoiz onartuko». Hausnarketa hori egin du Espainiako Atzerri ministroak, Donostian, Carlos Iturgaitz eta Zoe Nubla EAEko PPren hautagaiei babesa emateko eginiko ekitaldian.

Euskal Herrira etorri bada ere, Kataluniako prozesu subiranistaz mintzatu da. Ukrainako errusiazaleek azken asteetan eginiko erreferendumekin konparatu du Katalunian azaroaren 9an egitekoa dena, eta azpimarratu du legez kanpokoak direla eta nazioartearen onespenik ez dutela. Margallo da Madrilgo gobernuaren bozeramailea, Espainiako Estatuaren egitura zalantzan jartzen ari diren prozesu subiranisten inguruan. Hauteskunde kanpaina honetan hainbat alditan egon da Katalunian, eta bitan Euskal Herrian: atzo Bilbon, eta herenegun Iruñean. Margallok uste du ez direla konparatzeko modukoak herrialde baten egoera eta bestearena. Adibidez, apirilean esan zuen Mariano Rajoyren gobernua prest zegoela Eusko Jaurlaritzarekin hitz egiteko, Iñigo Urkullu lehendakariak Aberri Egunean aipatu zuen harreman eredu konfederalaz hitz egiteko. Baldintza bat jarri zuen, halere: «Espainia guztiak» ematea iritzia bi aldeen balizko akordioari buruz. EAJk kritikak entzun behar izan zituen Kataluniatik, hango hainbat eragilek salatu baitzuten Madrilen erantzuna izan zela Kataluniako prozesuan eragiteko. EAJk ez du berriz ere mahai gaineratu bere proposamena.

Atzo Bilbon eginiko ekitaldian, Margallok ez zuen aipatu jeltzaleen proposamena, baina ohartarazi zuen prozesu independentista batek Euskal Herrian izango lituzkeen kalteez, ikuspuntu ekonomiko batetik, bereziki. Margallok azaldu du krisialdi ekonomikoak agerian utzi duela estatu txikiek —Irlanda, Islandia eta Zipre aipatu zituen— «zailtasun handiagoak» dituztela krisiari erantzuteko eta «multinazional eta enpresa handien nahiei aurre egiteko». «Errazagoa da estatu txikiei inposatzea haien interesak, estatu handiei baino», ondorioztatu du.

Arantza Quiroga EAEko PPko presidenteak ere hartu zuen hitza ekitaldian, eta «90eko hamarkadan bezala oldartzera» deitu zituen alderdiaren boto emaileak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna