Albistea entzun

Eusko Jaurlaritzaren murrizketak (III)

Gorriak ez, beltzak dira marrak

Koldo Tellitu -

2013ko martxoak 9

Egunkariei begira jarri naiz. «Murrizketen ondorioz, guztiz mugatu da gure jarduera» (Jasone Mendizabal, Topaguneko lehendakaria). «Ez dugu urte osoan ikerketak egin ahal izateko adina diru» (Andres Urrutia, Euskaltzainburua). «Murrizketen ondorioz, guztiz mugatu da gure jarduera» (Mertxe Mugika, AEK-ko koordinatzaile nagusia. «Ez dugu proiekturik bertan behera utzi, baina bai baldintzak estutu» (Iñaki Murua, Bertsozale Elkarteko lehendakaria). Egunkariei begira, bai, baina 2012ko urtarrilaren 31ko BERRIAren zenbakiari begira zehazki. Ordukoak baitira euskalgintzako eragile horien adierazpenak. Orduko Eusko Jaurlaritzak aurrekontuetan euskalgintzari egindako murrizketek nola eragin zieten azaldu zuten erreportaje horretan.

Marra gorriak igaro ziren orduan. Are gehiago, hitz emandako zenbait laguntza bertan behera utzi zituen Patxi Lopez lehendakariaren gobernuak. BERRIAk badaki, jakin ere, zertaz ari naizen. Eta geuk, ikastolok, ere ikusi genuen eman ziguten hitza ez betetzen.

Urtebete igaro da, aldatu da Eusko Jaurlaritza, badatoz aurrekontu berriak, eta marra gorrietatik harago, beltzak ikusi ditugu. Ezer gutxi dakigu, egia da, euskalgintzak izango dituen diruei buruz. Egun gutxi barru aurkeztuko dizkigute, hori ere horrela da. Zer dela eta, orduan, kezka baino gehiago alarma pizte hau?, galdetuko du baten batek. Aurkeztu aurretik abisua eman digutelako, murrizketa handiak datozela iragarri digutelako Eusko Jaurlaritzatik bertatik. Dakigun apurrak zeharo beldurtu gaitu, muineko kontuak ukitzen direlako, gune ahulenak, baina funtsezkoak, azken ezpata-kolpearen mehatxupean direlako.

Gogoan iltzatuta dauzkagu, ondo iltzatuta gainera, Iñigo Urkullu lehendakariak, artean hautagai zela, Hamaika Telebistan esan zituen hitzak: «Bai, guretzat kultura gure izaeraren sena da, eta horretan ez da izan behar murrizketarik, eta euskaran are gutxiago. Nik uste dut urratsak egiten jarraitu behar dugula».

Tristea da baieztatzea orduko esanek balioa galdu dutela. Murrizketak ezinbestean egin behar direla argudiatu dezakete, baina orduan ere ari ziren horretaz mintzatzen, ari ziren 1.200 milioi euro gutxiago izango zirela aurreratzen, eta «ez da izan behar murrizketarik» eta «euskaran are gutxiago» esan zuten orduan.

Begira diezaiegun orain iragarritako «murrizketa handiek», egiaztatzen badira, ekarriko dituzten ondorioei; ez da fikzio ariketa bat, erraza da aurreikusten: lehenik eta behin, normalizazioan atzerapauso nabarmena; horrekin batera, hainbat proiektu bertan behera utzi behar izatea; are gehiago, zenbait enpresa itxi behar izatea eta beste zenbaiten iraupena kinka larrian jartzea. Aurpegiak ere jar diezazkiekegu ondorioei: beharrik gabe geratuko diren langile on, kualifikatu, prestu eta militante ugarirenak.

Espero dugu irudikatu dugun etorkizun hurbil hori irauli ahal izatea. Espero dugu Eusko Jaurlaritzako lehendakariak iazko urrian esandakoa betetzea. Euskararen eremuan ezin baita murrizketarik egin, are gutxiago azken urteotan jasan behar izan ditugun murrizketen ondoren. Euskara, euskalgintza, lehentasunekoa da, estrategikoa da, eta hala izanik, baliabideetan ere islatu egin behar da, eta hori ikustea espero dugu aurrekontuak aurkezten direnean.

Euskalgintzako eragileok ez dugu alde batera utziko euskararekiko dugun konpromisoa, ezta murrizketak izanda ere. Urteetan euskalgintza aurrera atera da auzolanari, militanteen lanari, herritarren laguntzari eta gizarte elkartasunari esker.

Euskalgintzako erakundeak herritik sortu eta aberasteko asmorik gabeko erakundeak gara, herri honi zerbitzu publiko bat eskaintzen diogu, lehentasunezkoa eta estrategikoa, eta hori egiten jarraitu nahi dugu, gainera gaur egun ditugun langileekin, guztiekin. Eta langileon lanpostuen defentsa beste inondik ez baletor ere, guk geuk defendituko ditugu, beti bezala.

Bihar: Mikel Irizar, Topagunea federazioko presidentea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Aitziber Arzallus - Gipuzkoako Hitza

«Espero dut orain sendaezinak diren gaixotasunak sendatzen ikustea»

Aitziber Arzallus - Gipuzkoako Hitza

Familiatik jaso du neurologiaren inguruko interesa Itxaso Martik, aita eta ama profesional entzutetsuak izandakoak baititu. Maite du bere lanbidea, nahiz eta aitortu une zail asko tokatzen zaizkiola.

Ertzaintzaren helikopteroa erreskate lanetan, gaur, Aralarren. ©BERRIA

Berrobiko mendizale bat hil da Balerdi mendian, Aralarren

Berria

39 urteko mendizalea 50 metrotik behera erori da. Ertzaintzaren helikopteroaren laguntzarekin erreskatatu dute gorpua.

Atzo Jon Rodriguez omendu zuten milaka lagunak, errepidean. ©Urtzi Urkizu

Furgoneta gidari bat atxilotu dute, txirrindulari bat nahita harrapatzeagatik Hondarribian

Berria

Mendelu auzoko kamerei esker identifikatu dute ibilgailua, eta gendarmeek atxilotu dute gidaria. 69 urteko txirrindularia ospitaleratu egin dute. Eztabaida bat izan zuten aurretik.

Atzoko ekitaldia: jendea txistuaren eta danbolinaren erritmoan dantzan, Txillardegiren omenezko horma irudiaren aurrean. ©ANDONI CANELLADA / FOKU

«Zauria orbaintzeko» eskea

Julen Aperribai

Txillardegi oroitu dute Antiguan, eta Donostiako Udal Liburutegiari haren izena jartzeko eskaera ozendu. Ia 1.500 sinadura jasoak dituzte hala eskatzeko. Horma irudi berritua ere aurkeztu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.