Europako hauteskundeak. Kanpaina

Eskubideak lortzeko, mobilizatzera deitu du EH Bilduk

Juaristik esan du «dominazioaren kateak» hausteko ezinbestekoa dela herritarrak aktibatzea
David Fernandez, Josu Juaristi eta Patxi Zabaleta.
David Fernandez, Josu Juaristi eta Patxi Zabaleta. JAGOBA MANTEROLA / ARGAZKI PRESS

Erredakzioa -

2014ko maiatzak 15
«Estatuko erregimenaren dominazioaren kateak hausteko» deia egin die herritarrei Josu Juaristi EH Bilduko zerrendaburuak. Iruñean, Foruen monumentuaren aurrean eginiko ekitaldi batean, Juaristik salatu du euskal herritarrek «mendeak» daramatzatela «eskubideak ukatzen dizkien estatu baten [Espainia] menpe». Hori amaitzeko garaia dela azpimarratu du EH Bilduko kideak, eta hori lortzeko mobilizatzeko deia egin die herritarrei. «Gure etorkizunaren jabe izateko garaia heldu da», azpimarratu du.

Ekitaldian David Fernandez Kataluniako CUPeko burua izan da. Hauteskundeetan ez aurkeztea erabaki duen arren, CUPek babesa agertu dio EH Bilduri, bi indar politikoek eskatzen duten aldaketa politikoa eta soziala «antzekoa» delako.

Horrekin batera, bi herrialdeen «autodeterminazioaren aldeko borroka» nabarmendu du Fernandezek. Haren esanetan, herritarren parte hartzea ezinbestekoa da helburu hori lortzeko, eta azpimarratu du parte hartze horrek egiten diola «minik handiena» Europari.

Salaketa 'La Razón'-en aurka

Donostian eginiko agerraldi batean, EH Bilduk jakinarazi du La Razón egunkariaren aurkako kereila bat jarriko duela auzitegian. Kazeta horrek astelehenean argitaratu zuen ETAk erregistratu egin duela koalizioa alderdi politikoen bulegoan. EH Bilduk jakinarazi du aurrerantzean «bide judizialetik» joko dutela koalizioa iraindu eta gezurra esaten dutenen aurka.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
S: