Albistea entzun

Sorturen Kongresua. Ekitaldia

Lehen urratsa egin du Sortuk

Otegik espetxetik bidalitako gutunean mentalitatearen iraultza aldarrikatu du: «Kontsigna gutxiago eta argudio gehiago»

Independentzia lortzeko xedea dutenekin estrategia hitzartzeko prest azaldu da Sortu
Sorturen Kontseilu Nazionaleko kideak, Anaitasuna kiroldegian atzo arratsaldean eginiko ekitaldian.
Sorturen Kontseilu Nazionaleko kideak, Anaitasuna kiroldegian atzo arratsaldean eginiko ekitaldian. I. ZABALETA / ARP

Joxerra Senar -

2013ko otsailak 24

Bere estatutuak aurkeztu eta bi urtera, Espainiako Konstituzionalaren murrua gainditu ostean, bere bideari ekin dio jada Sortu alderdiak. Iruñeko Baluarte jauregian egin du bere lehen biltzar eratzailea, eta han, laurehun biltzarkideren zein nazioarteko eta Euskal Herriko beste hainbat eragileren aurrean, Hasier Arraiz Sortuko presidente izendatu berriak argi esan du zein den helburua: independentzia lortzea. «Askatasun osoa dugu helmuga». Horretarako, helburu horrekin bat egiten duten indar politiko eta sindikal guztiekin «Euskal Herriaren lema partekatzeko» prest azaltzen da Sortu; «betiere nora goazen adosteko gai baldin bagara», zehaztu du. «Askapen prozesua» bururaino eramateko tresna izan nahi du Sortuk, nahiz eta bidean «gorabeherak eta kontraesanak» sortuko direla ohartarazi.

Biltzarrari amaiera eman dio Arraizek, eta esanguratsua izan da azken diskurtso horretan nori egin dizkion lehen hitzak: euskal presoen senideei. Kartzeletara honako mezu hau helarazteko eskatu die: «Beraiekin gaude, orain eta beti, eta gure esku dagoen guztia eta gehiago egingo dugu gurekin lehenbailehen egon daitezen».

Hain zuzen ere, iragana behin betiko atzean uzteko gatazka politikoari konponbide oso bat ematea da Sorturen beste erronka nagusia. « Ez da erraza izango. Bakezale asko omen dago Madrilgo eta Parisko gobernuetan, baina gaur egun eragile politiko nagusien artean bakegile gutxiegi topatzen ari gara». Blokeoa gainditzeko, gatazkaren muin politikoa askatzea eta «ondorio guztiei irtenbidea ematea» izango dira lehentasunak.

Otegi: «Zorrotzak izan»

Biltzarra Arraizekin amaitu da, baina idazkari nagusi izango denarekin hasi da. Postu hori, berez, oraingoz hutsik egongo da, harik eta Arnaldo Otegi espetxetik irten arte. Hain zuzen ere, Otegik kartzelatik bidalitako gutun bat irakurri du Karmele Aierbek, eta bertan Sorturen militantzia osoari galtzak bete lan eman die. Otegik mentalitatearen iraultza eskatu du. «Kontsigna gutxiago eta argudio gehiago behar ditugulako, ardatza parte hartzea delako, buruatsegin gutxiago eta autokritika eta antolakuntza askoz gehiago behar ditugulako». Otegik dio ezker abertzalea ez zela betiko erresistentzia egiteko edo protesta egiteko sortu. «Askatasuna irabazteko baldintzak sortzeko antolatu zen. Eta hori lortzeko, zorrotzak izan behar dugu».

Egoeraren analisia ere egin du. «Une historikoa eta erabakigarria» dela dio. «Nazio askapenerako borrokaren ikuspuntutik», bi ondorio ekarri ditu krisiak: «Estatu espainiarrak bizi duen deskonposizio prozesua, mendeetan izan ez dena», eta ongizate estatua eraistea helburu duen kapitalismoaren kontraerasoa.

«Zer egin egoera honetan? Aukera guztiak baliatu», esan du espetxetik Otegik. Alternatiba bat eraiki, eta horren inguruan gehiengo zabalak biltzea izango da Sorturen erronka, haren hitzetan. «Hain zuzen, horregatik erabaki genuen estrategiaz aldatzea», azaldu, eta hainbat zalantza planteatu ditu: «Benetan azaldu dugu eta barneratu aldaketa estrategiko honen sakontasuna? Jabetzen gara hemen eta orain euskal estatua deklaratu eta eredu sozial alternatiboa eraikitzeko lan historiko itzela dugula aurrean egiteko? Ala uste dugu iraganarekiko ezberdintasun bakarra borroka armatuaren desagerpena dela?».

Pare bat orduz, kazetariak ez dira biltzarrean egon. Azpimarratu behar da nazioartetik zein Euskal Herritik gonbidatu andana izan dela. Euskal Herritik, Baluarten izan dira, besteak beste, Aralarko Patxi Zabaleta eta Asun Fernandez Garaialde; EAko Maiorga Ramirez; EAJko Manu Aierdi; Geroa Baiko Uxue Barkos; Abertzaleen Batasuneko Mertxe Colina; Nafarroako Ezker Batuko Jose Miguel Nuin; Bilduko Bakartxo Ruiz; Amaiurko Sabino Cuadra eta Xabier Mikel Errekondo; ELAko Mitxel Lakunza...

EPPK-ren mezua

Bigarren zatian, Iñaki Zabaletak hartu du gidaritza, eta euskaraz zein ingeles txukunean mintzatu da. Lehenik eta behin, Euskal Preso Politikoen Kolektiboaren gutuna irakurri du Kandido Zubikaraik. Gogora ekarri duenez, «ezker abertzalearekin batera» egin da bidea orain arte, eta aurrerantzean horrela jarraitzeko asmoa dago: «Zuek kanpotik eta guk barrutik».

Zubikaraik nabarmendu du Euskal Herriaren gehiengoak argi utzi duela presoen auziak lehentasuna duela eta «Parot doktrina zein sakabanaketa» indargabetu behar direla. Zubikaraik azpimarratu du «guztien artean» aukera berriak sortu direla, baina Espainiako zein Frantziako estatuak aukera horiek ito nahi dituztela salatu du. «Presoak prozesua zingiratzeko erabili nahi dituzte, baina presoen egoeraren hobekuntza baino gehiago prozesuaren bideragarritasuna dago jokoan». Egungo blokeo egoerari aurre egiteko, «irudimena, ausardia eta erabakitasuna» aldarrikatu ditu.

Nazioarteko egoeraren eta biltzarraren ebazpenak ia-ia aho batez onartu ostean, kontseilu nagusia izendatu dute —ikus alboko irudia—. Arraiz izendatu dute presidente.

Arratsaldean, Anaitasuna kiroldegian ekitaldi politikoa egin du Sortuk. Sinn Feineko ordezkariak presoen egoera konpontzeko beharra dagoela azpimarratu du, eta Sirizako kideak Otegi aske uzteko eskatzearekin batera, herrien batasuna aldarrikatu du krisiari aurre egiteko. Amaieran, Pernando Barrenak konpromiso irmo bat adierazi du: «Sortuk ez du bake itxaropena zapuztuko». Konpromisoa eta antolakuntza aldarrikatu ditu: «Horrek ekarri gaitu hona, eta horrek bakarrik eramango gaitu garaipenera».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Idoia Mendia, atzo. ©PSE-EE

PSEk «legediaren» balioa goraipatu du

Edurne Begiristain

Mikel Unzalu PSEko legebiltzarkide zena oroitu dute. Estatutua goretsi du Mendiak
Isabel Rodriguez eta Olatz Garamendi, atzo, Madrilen. ©FERNANDO ALVARADO / EFE

Beste bi transferentziari buruzko proposamena egingo du Madrilek urrian

Gotzon Hermosilla

Bizitzeko gutxieneko diru sarrera eta trenbideak dira Jaurlaritzari eskualdatu beharreko eskumenak. Transferentzia aurten itxi nahi dute
Ehunka lagunek egin dute bat Arrasaten, Sare-ren deialdiarekin

Ehunka lagun Arrasaten, euskal presoen eskubideen aldeko bilkuran

Iñaki Agirre - Jon Ordoñez Garmendia

Eguerdian euskal presoen eskubideen aldeko 50etik gora bilkura egin dira Euskal Herrian, Sarek atzo bertan behera utzi zuen martxaren ordez. Ertzaintza Voxen bilkuraren aurka protestan ari ziren antifaxistei oldartu zaie Arrasaten, eta taberna batean zegoen gizon bat zauritu du.

Arnaldo Otegi EH Bilduko koordinatzailea, artxiboko irudian ©Gorka Rubio/ Foku

Otegi: «XXI. mendean burujabetzak estatu izena du»

Edurne Begiristain

EH Bilduk Konferentzia Politikoa egin du gaur goizean Donostian, aurrera begirako erronkak zehazteko. Lan politikoaren, hezkuntza proposamenaren eta plan feministaren inguruan bozkatu dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna