Etxarri Aranazko Udalak uko egin dio galdeketa dela-eta gobernuak irekitako auziari

Gobernuaren «sarean erortzeko» asmorik ez duela dio, eta herri ekinbideak galdeketa egiteko nahia azaldu du

Joxerra Senar -

2013ko irailak 26
«Beldur diote gure herritarrek zer pentsatzen duten galdetzeari». Joxi Bakaitzeko Etxarri Aranazko alkateak jakinarazi duenez, udalak ez du «gobernuaren sarean erortzeko asmorik», eta, horregatik, herri galdeketaren inguruko auzi judizialari uko egitea deliberatu du. Bakaikoak Nafarroako Gobernuaren jarrera gaitzetsi du, «ahaleginetan ari direlako Etxarrin galdeketa bat egin ez dadin». Haren esanetan, galdeketa egiteko eskaera «gatazka juridiko luze, garesti eta antzuetan murgildu nahi izan du» UPNren gobernuak. Udalaren ustez, gobernuak «herritarrei ahotsa kentzea» du helburu bakar, baina horrekin beldurra baino ez dutela adierazten uste du Bakaikoak.

Etxarri Aranatzen, urtarrilean ekin zioten galdeketa bat egiteko bideari, Etxarri 2012+1 herri ekinbidearen bitartez. Nafarroako foru legearen baldintzak betetzen zituelakoan, ekinbideak herri galdeketa bat egiteko sinadura bilketa egin zuten, eta, ondoren, udalera igorri zuten eskaera. Maiatzaren 10ean, udalbatzak Bildu eta NaBai koalizioen aldeko botoarekin gehiengo handiz onartu zuen proposamena, eta, ondoren, gobernuari bidali zion. Udal batek herri galdeketa egiteko eskaera igortzen duenean, gobernuak Espainiako ministroen kontseilura bidali ohi du, baina kasu horretan Nafarroako gobernuak Administrazioarekiko Auzitegiaren eskuetan utzi zuten auzia.

Gobernuaren jarrera kritikatu zuten atzo bai udal gobernuak bai Etxarri 2012+1 herri ekinbideak. Mikel Mundiñano ekinbideko ordezkariaren esanetan, gobernuak «trikimailu juridikoak baliatu ditu bere eginkizuna bete eta Madrilera bideratu beharrean ekinbidea bertan behera utzi eta ukatzeko». Udalarekin bat egin du, eta uste du gobernuak demokraziari beldurra azaldu diola.

Hala ere, herri ekinbideak ez du geldi geratzeko asmorik. «Nafarroako Gobernuak gatazka bilatzen duen bitartean, Etxarri 2012+1 ekinbideak herritarron arteko errespetua eta bizikidetza ditu helburu. Haren ustez, «ez du zentzurik indarrak eta denbora gatazka juridikoetan galtzea». Hala, udalarekin elkarlanean jarraitzeko prestutasuna azaltzeaz gain, herri galdeketa egiteko borondatea berretsi du. Horretarako «modu berriak» jorratuko dituztela ziurtatu du.

«Harantzago» joateko asmoa

Joxi Bakaikoa alkatearen ustez, berriz, argi geratu da «haratago» joan behar dela: «Etxarriko herriak bultzatutako erronkak agerian utzi du egungo instituzioetan eta egitura politikoetan ez dugula tokirik. Muga juridiko eta administratiboak gainditu eta gure bideak jorratu behar ditugu». Udalak deitzen dio «gizarte zibilari eta alderdiei erabakitzeko eskubidearen aldeko urratsak egitera».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna