Suprefetaren kasketa eta batzuen boneta

Ez dira gaurkoak Prefeta edo Suprefaren gutunak tokiko Auzapezeri ikastoletako egoitzak altxatzeko unean. Ez dira gaurkoak mehatxu eta beldur ezartze kontuak, baina Seaska eta ikastolen lan seriosak emaniko sinesgarritasunak lagundu izan du alde guzietako hautetsi eta Auzapezekin Falloux legeari zirrikitua aurkitzea. Horrela egin da aitzina, nahiz eta beti present egon den eta dagoen Falloux legearen ezpata madarikatua.

Lege oso zaharra, duela hogeita hamar urteko moldeak, baina egoera eta jendartea ez dira berdinak, eta egun, lan franko egiteke egon arren, Ipar Euskal Herria euskararen berreskuratzearen norabidean dagoela begi bistakoa da. Hala ere, oraino ez da guzia irabazia, Suprefetaz gain aurkako jarrera hartu baitute Hendaiako zenbait hautetsik. Suprefetaren kasketaz gain, boneta batzuk ere egon dira joko egin diotenak Parisetik gurea gobernatu nahi dutenei.

Guzia Hendaiako Ikastola berriarekin piztu da, baina ukaniko erasoa Ipar Euskal Herriko Ikastola gehienen aurkakoa da. Horrelako jarrerarik ez dadin berriro gerta legea aldatzea ezinbestekoa da, kapelu eta bonetatik ez dezaten berriro atera.

Larunbateko manifestaldiarekin fermuki, ozenki eta irri eginez erakutsi beharra dugu Hendaian, urteetan eginiko lana, urteetan borroka bidez lorturikoa ez dadin bere horretan utzi, beharraz eta nahiaz gain, determinatuak gaudelako euskararen berreskuratze prozesuan murgiltze sistema bidez. Hendaiako Ikastola berria orain! Ez hunki hango eta hemengo ikastolak!