Albistea entzun

Guztiz desager ez dadin

Hiru urte beteko dira bihar Borja Lazaro gasteiztarra Kolonbian desagertu zenetik. Mobilizazioak antolatu ditu sendiak gaurko, Gasteizen, kasua gogoan izateko.
Borja Lazaroren ama Ana Maria Herrero eta anaia Sergio Lazaro, Gasteizen.
Borja Lazaroren ama Ana Maria Herrero eta anaia Sergio Lazaro, Gasteizen. JUANAN RUIZ / ARGAZKI PRESS

Beñat Alberdi -

2017ko urtarrilak 7 - Gasteiz

Bahituta, itsasoan itota edo desertuan galduta. Hiru hipotesiok aztertu ditu Kolonbiako Polizia Nazionalak. Ez dute bat bera ere baieztatzerik izan, ezta ezeztatzerik ere. Baina hiru urte igaro dira jada Borja Lazaro Herrero 35 urteko gasteiztarra desagertu zenetik, Kolonbiako La Guajira penintsulan. Borrokan jarraitu behar duela garbi dauka sendiak: «Gizarteak Borjari buruz hitz egiten duen bitartean, ez da izango guztiz desagertutako pertsona bat».

Urtarrilaren 7ko gauean ikusi zuten azkeneko aldiz Lazaro, Cabo de la Vela herrian. Beste bidaiari batzuekin trago batzuk hartu zituen, eta lotarako bidea hartu zuen gero. Baina gauez linterna bat eskatu zuen ostatutik irteteko. Irten eta gero zer gertatu zitzaion inork ez daki.

Ingeniaritza informatikoa zuen ofizio. Luxenburgon zazpi urte egin ostean, hango lana uztea erabaki zuen 2013an, eta Gasteizera itzuli zen. 34 urterekin Latinoamerika bisitatzea erabaki zuen, bakarrik. Argazkilaritza zuen afizio. Abenduan, La Guajirako indigenei argazkiak atera zizkien, eta, urtarrilean, argazkiak eramatera itzuli zen Cabo de la Velara.

Hiru hipotesi izan ditu mahai gainean Kolonbiako Polizia Nazionalak: itsasoan ito zela, desertuan galdu zela —erdi basamortu lurraldea da La Guajira penintsula—, eta bahitu egin zutela. Hala ere, ildo batek ere ez du aztarna argirik eman. Basamortuan zein desertuan bilaketak egin zituzten, baina emaitzarik ez zuten lortu. Eta ez du inork dirurik eskatu, edo aldarrikapen politikorik egin. Ez aurrera ez atzera dago ikerketa.

«Ikerketa zabalik dago», azaldu du Sergio Lazaro desagertuaren anaiak. «Baina ez dago bilaketa aktibo bat, ez dagoelako zantzu berririk». Nabarmendu du inork ez duela informazio berririk eman, nahiz eta Poliziak ordainsaria eskaini duen datu baliotsuak ematen dituztenentzat. «Bere garaian zerbait ikusi edo entzun zuenak informazioa ematea da gakoa», zehaztu du Ana Mari Herrero amak. «Agian ez zion orain arte garrantzirik emango, baina ateak zabaldu ditzake». Egoera ernegagarria dela gaineratu du anaiak: «Arrasto berririk agertu ezean, kasua lehentasunezkoa ez izateko arriskua dago».

Hain zuzen, kasua ahatz ez dadin, kontzentraziora deitu du gaurko familiak: 18:30ean, Gasteizko Posta plazan. 19:30ean, berriz, kontzertuak eskainiko dituzte O'Connor's tabernan. «Borjaren egoera ikusaraztea da helburua. Zerbait egin dezaketenek ikus dezatela sendia eta lagunak haren bila dabiltzala», esan du Herrerok.

Ikerketaren berri, azkenekoz, duela bi aste izan zuten. Arduradunarekin hitz egin ahal izan zuten, Ertzaintzarekin egindako bileran. Izan ere, Ertzaintza da familiaren eta Kolonbiako Poliziaren arteko lotura. «Ikerketaren eskumena hango Poliziarena da. Hemengoek ez daukate zer eginik han», argitu du Sergio Lazarok. Eskumen arazoak direla medio, instituzioei presioa egiteko eskatzen diete. «Gasteizko Udalak ezin du ezer egin Kolonbiako desagertze bat argitzeko eskatuz, baina Kanpo Arazoetako Ministerioak bai».

Protokolorik gabe

Espainiako instituzioen arreta falta salatu du anaiak. 2016ko urtarrilean erregearekin batu ziren; bilera haren ostean jaso zuten Espainiak Kolonbian daukan enbaxadorearen deia. Harrezkero, ez daukate haren berririk. «Kolonbiako delegazioak bakarrik egin dezake ikerketen jarraipena. Ez dakigu ezta lana ondo betetzen dabiltzan ere».

Desagertutako pertsonen kasuei erantzuteko protokolo falta ere sumatu du Lazaroren amak: «Ez dago inon zehaztuta zer egin behar duzun senideren bat desagertuz gero». Oztopoak agertu ahala gainditu dituztela zehaztu du Herrerok, inoren laguntza jaso gabe: «Abisuak bidali zizkiguten, Borjaren etxeko argindarra moztuko zutela, adibidez, ez zuelako ordaindu». Luxenburgora joan behar izan zuen amak kontuak argitzera, abokatua, bidaia eta itzulpenak bere poltsikotik ordainduta. Oraindik, hauteskundeetan semeak non bozkatu behar duen azaltzen duen gutuna iristen zaie.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzaren auto bat, artxiboko irudi batean. ©MONIKA DEL VALLE / FOKU

Santurtzin hilik topatutako adingabe baten heriotza ikertzen ari da Ertzaintza

Jon O. Urain

Ostiralean zerraldo topatu zuten senideek. Ertzaintzak baieztatu du gorpuak kolpeak zituela eta litekeena dela horien ondorioz hil izana
 ©Andoni Lubaki / Foku

Suak zerua ilundu zuenekoa

Edurne Elizondo - Nafarroako Hitza

Suteek hagitz gogor jo dute Nafarroa, eta 14.500 hektarea inguru utzi dituzte kiskalita. San Martin Unx da suak inguratutako herrietako bat. Etxerik ez dute galdu, baina izua bazter uztea ez da erraza izaten ari herriko biztanleentzat. Suhiltzaileek, berriz, baliabiderik eza salatu dute.

Eva Isturiz, Nafarroako Berdintasun Institutuko zuzendaria, Iruñeko Sarasate pasealekuan. ©Idoia Zabaleta, FOKU

«Sexu erasoetan, biktimak bere buruari egotzi ohi dio errua»

Uxue Rey Gorraiz - Nafarroako Hitza

Festetako sexu erasoen kontrako aurtengo kanpaina aurkeztu du berriki Nafarroako Berdintasun Institutuak, Berridatz ditzagun jaiak lelopean. Erasoen gaineko aurreiritziak hautsi beharra nabarmendu du erakunde horretako zuzendari Eva Isturizek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...