Albistea entzun

'Parot doktrina'. Estrasburgoren epaia

Sortuk dio «arduraz» jokatuko duela, ez dituelako biktimak «mindu» nahi

Urkullu lehendakariak esan du ez duela gustuko Estrasburgoko epaiaren ondoren «garaipen keinuak» ikustea

Erredakzioa -

2013ko urriak 24

Sortuk «pozez» jaso du 197/2006 doktrinaren inguruan Estrasburgok emandako epaia, batez ere Ines del Rio Euskal Herrian delako, «bere eskubideen jabe». Baina poztasun horretan «arduraz» jokatuko du alderdiak, «biktimak ez mintzeko». Horrela adierazi du Hasier Arraiz Sortuko presidenteak, Euskadi Irratian egin dioten elkarrizketan. Azaldu duenez, biktimei saminik ez eragiteko Sortuk ez du aske geratzen diren presoentzako ongietorririk antolatuko. «Beste gauza bat da herriak egiten badu», esan du. Arraizek gogorarazi du ezker abertzaleak duela bi urte azterketa kritikoa egin zuela biktimekiko izan duen jarreraren inguruan eta aitortu egin zuela bere jarrera politikoa, «nahi gabe bada ere», biktimekiko mingarria izan zela. Azterketa horren barruan kokatu du Parot dotrinaren inguruan «arduraz» jokatzeko erabakia.

Edonola ere, Sortuk uste du Estrasburgok eman duen epaiak bakebiderako aukera zabaltzen duela eta abagune berri hori baliatu beharko litzatekeela. Besteak beste, espetxe politika aldatzeko eskatu dio Arraizek Espainiako Gobernuari. Sortuk eta ezker abertzaleak euskal presoak askatzeko lanean dihardutela esan du, eta gaineratu du elkarrizketa politikoa bultzatuta euskal alderdi politikoen artean «sinergia berriak» sor daitezkeela.

Ezker abertzaleari mintzatu zaio, hain justu ere, Iñigo Urkullu lehendakaria. Estrasburgok Parot doktrina bertan behera utzi ondoren askatuko dituzten presoen kasuetan «zentzuz» jokatzeko eta omenaldirik ez egiteko eskatu dio. Horren harira, herritarrei galdegin die «gizartearen sentsibilitateari min egin diezaioketen harrokeriak saihesteko» eta «arrazionaltasunetik» emateko pausoak. Urkulluk esan du ez duela gustuko epaiaren ostean «garaipen keinuak» ikustea, «ez ikurrinekin, ez ikurrinik gabe». Era berean, gogorarazi du aske gera daitezkeen presoen artean «krimen larriak eta min handia» eragin dituztenak daudela eta «biktimen memoria» aintzat hartu beharrekoa dela.

Hala ere, lehendakariak ez du uste ebazpenaren ondorioz espetxe politika aldatzea beharrezkoa denik, Parot doktrina bera bertan behera uztea politika hori aldatu duelako jada. Legea zorrotz errespetatuko duen espetxe politika eskatu du Urkulluk, baina aldi berean presoei damua adierazteko eta iraganaren azterketa kritikoa egiteko eskatu die.

«Sumindura» PPrentzat

Nafarroako Gobernuarentzat, berriz, «onartezina» da epaia, eta «sumindura» eragiten du. Hura errespetatzea beste aukerarik ez dagoela aitortu du Juan Luis Sanchez de Muniain eledunak, baina ohartarazi du Giza Eskubideen Auzitegiaren epaiak ez duela «hiltzaile bat biktima bat bilakatuko».

Bestalde, Carlos Urkijo Espainiako Gobernuaren ordezkariak Iñigo Urkulluri eta Eusko Jaurlaritzari Estrasburgoko erabakiaren ondoren izan duten jarrera aurpegiratu die: «Ez dute zeresan askorik. Zorionez, espetxe politika ez da Euskadin erabakitzen». Urkijok dioenez, Estrasburgok hartu duen erabakia hartu badu, «urruti» dagoelako da, «Espainian jokoan zer zegoen ez zekielako». Horrez gain, espetxe politikarekin «esperimenturik» ez egiteko eskatuko du gobernuaren ordezkariak.

Jorge Fernandez Diaz Espainiako Barne ministroak esan du Estrasburgoko epaiak ETAren biktimengan sortu duen «samina eta sumindura» ulergarria dela, baina etsita aitortu du ebazpena onartzea beste biderik ez dagoela: «Estatuaren handitasuna horretan datza, eta gobernuak ez du ezer egiteko aukerarik; ezin dugu ezer egin».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Unai Hualde erdian eta eurekin Foro Sozialeko ordezkariak: Expe Iriarte, Fernando Armendariz, Agus Hernan, Jose Luis Uriz ©Nafarroako Parlamentua

Estatuaren biktimentzat 2022a «urte garrantzitsua» izaten ari da, Foro Sozialaren arabera

Joxerra Senar

Unai Hualde Nafarroako Parlamentuko lehendakariarekin bildu dira, eta nabarmendu dute «aurrerapausoak» ematen ari direla biktimak aitortuak izateko bide luzean

Ezkerretik eskuinera, Rodriguez eta Ruiz ©Ahal Dugu.

Garbiñe Ruiz eta David Rodriguez, Ahal Dugu-ko Gasteizko eta Arabako zerrendaburu izateko primarioetan

Iñaut Matauko Rada

Elkarrekin Podemos-IUko Gasteizko Udaleko eta Arabako Batzar Nagusietako gaur egungo bozeramaileak 'Bat Egin Podemos' proiektuaren barruan aurkeztu dira Ahal Dugu alderdiko primarioetara.

AEM Amnistiaren Aldeko eta Errepresioaren Aurkako Mugimenduaren webgunea, itxita. ©BERRIA

AEMk salatu du Guardia Zibilak webgunea itxi diela eta lagun bat atxilotu duela 

Berria

Amnistiaren Aldeko eta Errepresioaren Aurkako Mugimenduaren arabera, atxilotuari material informatikoa atxiki dio Poliziak. Aske utzi dute atxilotu duten egun berean.

Mikel Albisu, artxiboko irudi batean. ©maialen andres / Foku

Auzitegi Nazionalak Espainiatik ateratzeko debekua ezarri dio Mikel Albisuri

Berria

Albisuk eta Sagarzazuk gaur deklaratu dute epailearen aurrean. ETAk 2002an egindako atentatu batengatik sei euskal herritar ikertzen ari dira.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...