Kantuz eraikitako katedrala

10.000 ikusle bilduko ditu Berri Txarrak taldeak bihar Barakaldoko BEC erakustazokan emango duen kontzertuan, baina, saioaren tamainan jarri beharrean, abestietan jarri nahi dute arreta musikariek. Bideoa artikuluaren amaieran.
David Gonzalez, Gorka Urbizu eta Galder Izagirre Berri Txarrak taldeko musikariak atzo Barakaldoko BEC erakustazokan.
David Gonzalez, Gorka Urbizu eta Galder Izagirre Berri Txarrak taldeko musikariak atzo Barakaldoko BEC erakustazokan. MARISOL RAMIREZ / FOKU Tamaina handiagoan ikusi

Iñigo Astiz -

2018ko martxoak 16

Barakaldoko BEC erakustazokan 10.000 pertsonaren aurrean oholtzara igo, gitarra hartu, eta beren abestiak jotzeak sortzen dion bertigoa nabarmenduz hasi du azalpena Gorka Urbizu Berri Txarrak taldeko abeslariak: «Ez gaude ohituta gure diskoak hainbeste jenderen aurrean aurkeztera», aitortu du. «Entzule modura ere ez gara izaten oso rock-star zaleak; gehiago izaten gara masa gorroto duen masaren parte». Eta orduan heldu da David Gonzalez baxu jotzailearen etena: «Hala da, bai: ni neu ez nintzateke kontzertura etorriko». Broma modura joan da pasadizoa kontzertuaren aurkezpen prentsaurrekoan, eta barrez lasaitu dute tentsioa taldekideek, baina balio du Gonzalezen txantxak Berri Txarrakek bihar egingo duen emanaldiaren bakantasuna ulertzeko.

Xehe eman dituzte datuak. Guztira, 200 pertsonatik gora izango dira lanean, 150 argi aparatu baino gehiago jarriko dituzte martxan, bi pantaila erraldoi kokatuko dituzte agertokiaren bi ertzeetan, eta 25.000 watt soinu edukiko dituzte. Eta zifra multzo horren erdian hiru musikari baino ez oholtzan, arreta garrantzitsuen iruditzen zaien horretan jartzen saiatzen. «Gure harribitxia kantuak dira, eta horrek bakar-bakarrik balio beharko luke, baina edergarri batzuk ere izango dira», laburtu du erronka Galder Izagirre bateria jotzaileak.

Jendearen erantzunak nabarmen gainditu ditu antolatzaileen aurreikuspenak. 5.000 pertsona ingururentzat aritzea zuten buruan hasieran; motz geldituko zirela igarri, ordea, eta bikoiztu egin dute azkenean kopuru hori. Aretoa eta harmailak espresuki egokitu behar izan dituzte horretarako, eta teknikoki eta artistikoki horrek ekarri dien erronka nabarmendu dute musikariek. Aldaketa gogoz zirela azaldu du Urbizuk, ordea. «Batez ere, azkeneko diskoetan tokatzen ari zitzaigun Euskal Herriko kontzertuetan, bi, hiru eta baita lau gau ere jotzeko, eta aukera geneukan zazpi edo zortzi egiteko, eta pentsatu genuen: zergatik ez aldatu eta saiatu horrelako gau berezi eta bakan bat egiten gure zaleekin?».

Iaz kaleratu zuten Infrasoinuak diskoarekin ikusi zuten horretarako aukera, eta hortik Barakaldoko kontzertua. 200 sarrera baino ez dira gelditzen jadanik, eta ez da leihatilako salmentarik izango, ondorioz.

Milagarren kontzertua

Ardura sentitzen dutenik ez dute ezkutatu taldekideek, baina beldurrik ez dute, Urbizuk azaldu duenez. «Beti izan gara talde nahiko kameleoikara, bai estiloz eta bai bestela. Aurre egiten diogu datorrenari. Gai gara hirurok metro koadro erdi bakarrean sartuta jotzeko, eta, BEC aretoan 10.000 pertsonaren aurrean jotzeko aukera jarriz gero, ba hori ere egingo dugu, eta saiatuko gara ahalik eta ongiena egiten».

Alor teknikoa produkzioko lankideei utzita, abestietan kontzentratzea da taldekideen asmoa orain. «Oso esfortzu handia ari gara egiten, presio handia dugu, eta espero dugu dena ongi egitea, eta jendea prest etortzea gurekin bat egiteko».

Atzerrian hasi dute diskoaren bira, eta taldekideen hitzetan, baliagarri izan zaizkie emanaldi horiek kantak «berotuz» joateko. Besteak beste, Hego Korean, Txinan, Thailandian eta Australian egon dira, eta, hain zuzen ere, Zeelanda Berrian zeudela eman zuen taldeak bere milagarren kontzertua. «Pentsatzen dut BECen urteetan egindako lan horren oihartzuna egongo dela», azaldu du Urbizuk. Bartzelonako Razzmatazz aretoan ere izan dira aurreko asteburuan, eta Madrilen ere egotekoak dira apirilaren 14an, eta aurreratu dutenez, ia agortuta daude hango sarrera guztiak ere.

Musikariek azaldu dutenez, beti saiatu dira emanaldietako talde gonbidatuak ere zaintzen, eta The Baboon Show suediarrak hautatu dituzte bihar BECen haien aurretik aritzeko. Gonbidatuen energia, letrak eta zuzenekoak nabarmendu dituzte musikariek.

«Kontzertu hau bada mirari txiki bat», onartu du Urbizuk. Abeslariak gogoan izan ditu euskararen datu soziolinguistikoak, eta aipatu ditu euskal kulturak zabalpenerako dituen zailtasunak ere, eta, hain zuzen ere, horregatik aipatu du mirariarena. «Guk infra-tik begiratzen dugu mundua; azpitik. Horrelako gau berezi eta makroa, gorroto dut hitz hori, baina halako gau makroa antolatu ahal izatea bada mirari txiki bat». Taldeak bihar lortuko duen ikusgarritasuna, euskal kulturaren mesede izango den esperantza ere agertu du horregatik. «Garrantzitsua da egunerokoa, baina baloratzekoa da talde bat egotea, gutxienez, horrelako zerbait egiten. Jardunak berak normalizazioaren alde egiten du».

KONTZERTUA

Lekua. Barakaldon (Bizkaia), BEC erakustazokan.

Ordutegia.20:00etan zabalduko dute, 20:30ean hasiko da The Baboon Show taldea, eta 21:45ean, Berri Txarrak. Erakustazoka ireki baino ordu erdi lehenago egotea gomendatu dute.

Bideoa: Kontzertuaren aurkezpena (BerriaTB).

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

COVID-19aren jarraipen batzordea, Iñigo Urkullu lehendakaria buru dela, atzo Gasteizen. ©JON RODRIGUEZ BILBAO / EFE

Pandemia osoan izan den kopururik handiena zenbatu dute Bizkaian: 402

Olatz Esteban Ezkati

Hego Euskal Herrian 651 positibo izan dira. Hamasei egoiliar eta 36 langile kutsaturik daude Bizkaiko zahar etxeetan. Eusko Jaurlaritzak ez du baztertzen osasun larrialdia berrezartzea

Nekane Murga Osasun sailburua, atzoko agerraldian. ©Miguel Toña / EFE

Etxeratze agindua, zalantzazko muga

Irati Urdalleta Lete

Eusko Jaurlaritzak etxeratze agindua izan du hizpide; hau da, herritarrei eskubidea kentzea ordu jakin batetik aurrera kalean ibiltzeko. Adituek ez dute argi horretarako eskumenik ba ote duen.

Emakume bat, elikagaiak kalean saltzen, Quiton, Ekuadorko hiriburuan. ©JOSE JACOME / EFE

Birusari, errenta unibertsala

Cecilia Valdez

Koronabirusaren pandemiak pobrezia hedatu eta desberdinkeria areagotu duela ikusita, Latinoamerikako zenbait herrialdetan oinarrizko errenta unibertsala eta haren gisako neurriak ari dira aztertzen. Errentarentzako dirua nondik bildu, horixe da erronkarik handienetako bat.

Donibane Lohizuneko plaza, konfinamendu denboran ©Bob Edme

Donibane Lohizuneko ostatu bat hetsi dute

Ekaitz Etxamendi

Pirinio Atlantikoetako departamenduko prefeturak erabaki du Donibane Lohizuneko (Lapurdi) Le Miam ostatuaren hestea bost egunez, zigor gisa. Neurria beterik, gaur ireki dute berriro.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna