Albistea entzun

Iragana, gazteen begietara

Dokumentala aurkeztu du EGK-k; zenbait gaztek eta gizarte eragilek indarkeriari buruz egindako gogoetak biltzen ditu.

Topaketa antolatu dute Bilbon dokumentala aurkezteko
Dokumentalean agertzen diren gazteetariko lau, atzo, Bilbon, euren esperientziaren berri ematen.
Dokumentalean agertzen diren gazteetariko lau, atzo, Bilbon, euren esperientziaren berri ematen. MARISOL RAMIREZ / ARGAZKI PRESS

Gotzon Hermosilla -

2016ko otsailak 13 - Bilbo

Gazteak bildu ditu EGK Euskadiko Gazteriaren Kontseiluak Bilboko Azkuna zentrora. Xedea: bakeaz eta bizikidetzaz berba egitea, gai horren inguruan gazteek ere beren ikuspuntua eman eta ikuspuntu hori gatazka gerturik ezagutu izan duten edo euskal gizartean itzala duten eragileen iritziekin kontrastatu ahal izatea. Eta, bide batez, Bakehizketak film dokumentala aurkeztea.

Ekitaldiak 2015eko urrian Arrasaten (Gipuzkoa) egindako Bakehizketak izeneko topaketetan du oinarri. Orduko hartan, hainbat gazte asteburu batez elkartu ziren euskal gizarteko «eragile esanguratsu batzuekin», haiek adituak direlako, indarkeria gertutik jasan izan dutelako edota gizartean ospea eta itzala dutelako: horien artean, biktimak, kazetariak, historialariak, hautetsiak eta beste. Bakearekin eta bizikidetzarekin zerikusia duten zenbait gai landu zituzten topaketa haietan: memoria, hedabideak, presoak, hezkuntza eta gatazka eta generoa, esaterako.

Eragile ugari

Filmean, gazteekin batera, eragile ugari agertzen dira: besteak beste, Jose Antonio Perez historialaria, Iñaki Garcia Arrizabalaga —Komando Autonomo Antikapitalistek hildako Juan Manuel Garcia Arrizabalagaren semea—, Manuel Montero EHUko errektore ohia, Idurre Eskisabel EHUko Kazetaritza Saileko irakaslea, Jesus Loza Eusko Jaurlaritzako Bizikidetza batzordeko burua Patxi Lopezen agintaldian, Maixabel Lasa Eusko Jaurlaritzaren Biktimen Bulegoko zuzendari eta ETAk hildako Juan Maria Jauregiren alarguna, eta Iñaki Rekarte etakide ohia.

Parte hartzaile gehienek oso balorazio positiboa egiten zuten izandako esperientziaz. Garcia Arrizabalagaren hitzetan, «parte hartzea oso aktiboa izan zen, oso zabala, tolerantzia eta errespetu giro batean; ni oso pozik atera nintzen».

EGK-ko presidente Itsaso Anduezak ekitaldian azaldu zuenez, euren hasierako asmoa ez zen izan dokumental bat egitea: «Grabazio batzuk egin genituen, gure ekitaldi guztiak grabatu ohi ditugulako, baina oso ondo atera zela ikusi genuenez, pentsatu genuen euskal gizarteak ikusi egin behar zuela emaitza». Filmean, gonbidatuetako batzuek iritzia ematen dute, eta gazteek ere gogoeta egiten dute asteburu hartan bizi izandakoaz. Oro har, dokumentalean ETAren indarkeriaren inguruko aipamenak azaltzen dira bereziki.

Filma ikusi ostean, Arrasateko esperientzia errepikatu dute Bilboko Azkuna zentroan bildutakoek. Orduko hartan, hogei gaztek eta beste horrenbeste eragilek hartu zuten parte eztabaidetan; atzokoan, gazte eta eragile haietako askok berriro hartu dute parte, baina gazte eta eragile gehiago batu zaizkie: horien artean, Garbiñe Biurrun epailea, Teresa Toda Sareko bozeramailea, Francisco Etxeberria auzitegi medikua eta Martxelo Otamendi BERRIAko zuzendaria.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Foro Sozial Iraunkorreko koordinatzaile Agus Hernan, atzo, Zaballako espetxean. ©JAIZKI FONTANEDA / FOKU

Foro Sozialak azken bilera egin du EPPK-ko ordezkariekin

Gotzon Hermosilla

Honenbestez, bi aldeek bukatutzat eman dute 2017an irekitako elkarrizketa iraunkorreko etapa. Foro Sozialak esan duenez, EPPK-k ontzat jo du urte hauetako harremana
Gure Esku-ko Josu Etxaburu, atzo, Eusko Legebiltzarrean. ©JAIZKI FONTANEDA / FOKU

Gure Esku-k ekintzetara igarotzeko eskatu dio Eusko Legebiltzarrari

Iosu Alberdi

Elkarteak talde parlamentarioei exijitu die eztabaida «garden eta ireki» bat hasteko, erabakitzeko eskubidea arautzea helburutzat hartuta
Agus Hernan, Zaballako espetxean ©Jaizki Fontaneda / Foku

Foro Sozialak azken bilera egin du EPPK-ko ordezkariekin

Gotzon Hermosilla

Honenbestez, bi aldeek bukatutzat eman dute 2017an irekitako elkarrizketa iraunkorreko etapa

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...