BIRA

Sanchez, guapo!

Miren Amuriza -

2018ko ekainak 7
Pedro Sanchezi buruz eztabaidatzen aritu ginen lagun bat eta biok; ez Katalunian edo espetxe politikan izan lezakeen eragina aurreikusteko, baizik guapoa den ala ez erabakitzeko. Esan nion lagunari: hogei urteko atzerapenarekin iritsi izan ez balitz, Nire Bizitzako Gizonaren bertsio hobetua zatekeen (altua eta beltzarana, ilea orraztuta eta haginak zuri-zuri eroan ohi dituena, txaketarekin baina gorbatarik gabe ibiltzen dena eta garajean deskapotabletxo bat edukiko duena). Eta ez naiz hala ikusten duen bakarra, antza: «Pedro Sanchez, Espainiari hazten lagunduko dion guapoa», zioen The Times-en lerroburuak; BBCren arabera «ekonomialari fotogenikoa» da, Financial Times-ek «Mr. Handsome» (ederra) ezizena jarri dio eta Daily Mail-ek Antonio Banderasekin konparatu du. Sanchezen kordako jaun iritzi-emaileak mindu egin ditu, noski, Erresuma Batuko egunkariek presidentearen curriculumeko datuak bainoago, bere itxurari buruzko iruzkinak azpimarratu izanak. Neuri ere botako lidakete, agian, ea «Sanchez, guapo!»-ka zer demontretan ari naizen. «Lore bat baino ez da-eta!» erantzungo nieke, «ezin zaizue ezer esan, gero! Ala jeloskor zaudete zeuek ere Nire Bizitzako Gizonaren bertsio hobetua izan gura zenuketelako? Barbie eta bion Ken deskapotabledun harena...». Jaun iritzi-emaileek eurek esan ohi dizkigutenak erantzungo nizkiekeela, alegia.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna