Albistea entzun

BIRA

Onena izateaz

Miren Amuriza -

2018ko ekainak 8

Grazia egiten didate lehiatzear dauden kirolari, bertsolari, musikariek joko-bezperatan kazetarien aurrean esaten dituztenek, ditugunek: inor ez da irabaztera joaten, inoiz ere ez, baizik berea ematera, eginiko lanaren emaitzak erakustera eta (nire faboritoa) gozatu eta gozaraztera. Onena izan gura izatea (onena izan gura duzula agertzea, hobeto esanda) ez baita politikoki lar zuzena eta, geure buruei sinetsarazten saiatzeaz gain, horixe helarazten diegu ondorengoei ere: ume grinatsuen gurasoak, entrenatzaileak izan gura dugu denok (ez ume lehiakorrenak, ojo). Horrexegatik hasi gintzaizkien inportanteena parte hartzea zela errepikatzen. Ordea, beraiek «baita zera ere!» pentsatuz bezala begiratzen zigutenez, berbalizatu ezin den horretaz hitz egiten hasi behar izan genuen (sexuaz ahapeka mintzo diren haurrak nola): irabazteaz. Batzuek gehiago eta besteek gutxiago baina irabazi beti eta denok egiten dugula (esperientziatan eta abar) kontatzen diegu geroztik, porrot bat modu horretan prozesatzeko adina sendotasun eta denbora guztiek edukiko dutela egintzat emanda. Ordea, ez daukanari (gehiengoari) mesede handiagoa egingo ez ote liokeen hainbeste garailerentzako lekurik ez dagoela garbi esan eta bere espazio propioak lehiatik kanpo eraikitzera animatzeak. Orduan zu zergatik zoaz, txapelketara? (Glup) Esan dizuet, gozatu eta gozaraztera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...