Albistea entzun

Elizaren sexu abusuen biktimei aitortza egiteko legearen tramitea hasi dute

Navarra Sumak ez beste guztiek onartu dute legearen tramitea hastea. Biktimen arretarako bulego bat sortzea jaso dute bertan, besteak beste
Zenbait kontseilari, eta goian, Navarra Sumakoak, bilkura batean.
Zenbait kontseilari, eta goian, Navarra Sumakoak, bilkura batean. I. URIZ / FOKU Tamaina handiagoan ikusi

Olaia L. Garaialde -

2022ko ekainak 10

Gertatutakoa ikertu, biktimei aitortza egin eta egia azaleratu nahi dute legearen bitartez. Elizaren sexu abusuen biktimak aitortzen dituen legea tramiterako onartu zuten atzo Nafarroako Parlamentuan. Alderdi guztiek egin dute bat legea tramiterako onartzearekin, Navarra Sumak izan ezik. Mikel Buil Ahal Dugu alderdiko parlamentariak Navarra Sumaren jarrera salatu zuen: «Pena handia da, oinarrian denak ados baikaude; auzia hutsaltzen ari zarete».

PSNk, Geroa Baik eta Ahal Dugu-k Nafarroako Parlamentuan erregistratu zuten lege proposamena, maiatzean; EH Bilduk eta Ezkerrak ere bat egin zuten. Besteak beste, proposatu dute Nafarroako Gobernuak biktimen bulego bat sortzea, ikastetxe erlijiosoetan abusuak jasan zituztenen testigantzak eta salaketak jasotzeko. Bulego horretan, batzorde batek banan-banan aztertuko du kasu bakoitza, eta espediente bat zabalduko du. Horren arabera erabakiko dute salaketa jarri duen pertsona biktimatzat aitortzen duten ala ez. Gainera, bulegoak txosten bat sortu beharko du testigantzekin eta salaketekin.

Biktimen ahotsa

Virginia Magdaleno PSNko parlamentariak azaldu zuen biktimei «ahotsa ematea» dela helburua, eta abusuak ikusgai egitea. Gehitu zuen legea «berritzailea» dela. Navarra Sumaren erabakia salatu zuen: «Albo batera geratu da, ez du parte hartu nahi izan, eta Madrilgo PPren jarrera atzerakoiari jarraitzen ari zaio».

«Legearen helburua da Elizan denbora luzez egindako abusu sistematikoen inguruan sentsibilizatzea eta biktimei justizia eskaintzea», azaldu zuen Buil Ahal Dugu-ko parlamentariak. Auzibidean jarritako abusu gehienak preskribatuta daude: «Lege hau egin dugu erasotzaileak ezin ditugulako legearen bidez epaitu».

Geroa Baiko parlamentariaren arabera, aurrerapauso «handia» da: «Legea errekonozimendura mugatzen da, baina biktimentzat urrats garrantzitsua da». Gaineratu zuen hori dela egin dezaketen gauza bakarra: «Gainerako ekintzak gure eskumenetik kanpo daude».

EH Bilduko kide Arantxa Izurdiagak esan zuen legea «beharrezkoa» dela, baina «eskasa» dela egia, justizia eta erreparazioa lortzeko: «Oreka bilatzen saiatu gara, segurtasun juridikoa bermatzeko eta biktimei itxaropen faltsurik ez emateko».

Maria de Simon Ezkerra alderdiko parlamentariak salatu zuen Elizaren aldetik «abusu moralak» ere izan zirela, sexu abusuak izateaz gainera: «Ez da Elizaren edo fededunen kontrako lege bat; gertatu behar ez ziren eta isilarazitako gertakari batzuk zuzentzeko da legea».

Navarra Sumak, kontra egiteko, esan zuen «gaizki» idatzita dagoela legea. «Alde guztietan abusuak kontuan hartzen dituen lege bat sortu nahi dugu elkarrekin», esan zuen Iñaki Iriartek. Navarra Sumako parlamentariak esandakoa kritikatu zuen Ahal Dugu-k: «Banalizatzen saiatu zara; Nafarroako egoeraz hitz egiteko inuit komunitatera jo behar izan duzu». Horrez gain, Navarra Sumak aipatutako «izaera txikiko» zuzenketen inguruan negoziatzeko eta gauzak adosteko prest agertu zen.

Nafarroako Gobernuaren izenean, biktimak aitortu zituen Maria Txibite presidenteak, herenegun ekitaldi batean, eta esan zuen gizartearen «lorpena» izan zela; elkarteei egindako lana eskertu zieten: «Urte luzez sufritu duten isiltasunarengatik biktimizazio bikoitza sufritu dute». Eduardo Santos Nafarroako Gobernuko Justizia eta Migrazio Politiketako kontseilariak neurriak hartzeko eskatu zion Elizari: «Eliza ez da behar bezain ona izan; baztertu eta isilarazi baino ez ditu egin biktimak».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Euskaraldiaren balorazioa egiteko agerraldia, atzo, Gasteizen. ©RAUL BOGAJO / FOKU

Ariketa sozialarekin jarraitzera deitu dute

Edurne Begiristain

Aurtengo Euskaraldian 161.099 lagunek eta 6.634 entitatek eman dute izena. Ariketa soziala gizartean «txertatua» dagoela nabarmendu dute
 ©Gorka Rubio

Miren Dobaran: «Euskararentzat esparru gehiago irabazi behar ditugu; hori da gure obsesioa»

Julen Aperribai

Eusko Jaurlaritzak kirola, aisialdia eta eremu sozioekonomikoa ditu lehentasun nagusi. Hamarkada honetako hizkuntza politikaren oinarriak Euskara Sustatzeko Ekintza Planean zehaztu nahi ditu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.