Produktibitatea «balio etikoekin» lotzeko deia egin du Balluerkak

EHUko errektoreak ezinbestekotzat hartu du «bikaintasuna», baina «elitismoarekin» nahasi gabe. Protesta egin dute hitzaldiaren atarian
EHUko eta Eusko Jaurlaritzako ordezkariek parte hartu zuten irekiera ekitaldian, besteak beste.
EHUko eta Eusko Jaurlaritzako ordezkariek parte hartu zuten irekiera ekitaldian, besteak beste. ENDIKA PORTILLO / FOKU

Amaia Ramirez de Okariz Kortabarria -

2019ko irailak 12
Etikaren eta alde ekonomikoaren arteko harremana. Hori izan zuten aipagai atzo EHU Euskal Herriko Unibertsitatearen ikasturte berriko irekiera ekitaldian, Arabako campuseko Letren Fakultatean. Hain zuzen ere, Nekane Balluerka EHUko errektoreak uste du produktibitatea «balio etikoekin» lotu behar dela, «aliaturik onenak» direlakoan. Bikaintasuna ere izan du gogoan: «Lehiakorra den unibertsitate batek bikaintasunaren aldeko apustua egin behar du. Elitismoarekin desberdindu beharra dago hori». Iñigo Urkullu Eusko Jaurlaritzako lehendakariak, berriz, gaineratu du bikaintasun horrek «ebaluazioaren eta hobekuntzaren aldeko jarrera» eskatzen duela.

Zientziaren eta gizarte zientzien arteko elkarlana, finantzaketa publikoaren eta pribatuaren beharra eta nazioarteko harremanak ere zutabetzat jo ditu Balluerka errektoreak. Haren esanetan, unibertsitateak finantzaketa publikoa zein pribatua lortu behar ditu, betiere «interes ekonomiko eta enpresarialen» zerbitzura egon gabe. Errektorearen iritzirako, zutabe horiek kontuan hartuta posible da EHU unibertsitate «euskalduna, publikoa, bikaina eta inklusiboa» izatea.

Aurtengo ikasturtean graduko 34.000 ikasle izango ditu EHUk. Euskarazko adarretan eman dute izena erdiek baino gehixeagok, %53k, eta emakumeak gehiengoa dira ikasleen artean (%56).

Erronkak eta konpromisoak

Ikasturte honetako helburua ez ezik, 2018-2019ko ikasturtean EHUk izandako erronkak eta hartutako konpromisoak ere aipagai izan zituzten aurkezpenean. Prestakuntza dualeko eskaintza, ikerketaren aldeko apustua eta nazioarteko harremanak nabarmendu zituzten. «Erronka horiekin bat» dator Jaurlaritza ere, Urkulluren arabera.

Konpromisoei dagokienez, hiru hauek nabarmendu ditu Balluerkak: euskara eta euskal kultura, indarkeria matxistaren aurkako borroka eta «babes sistematik igarotako gazteei» laguntzeko Arrakasta programa. Goraipatu du unibertsitateak konpromiso «sendoa» duela euskararekin eta euskal kulturarekin, eta indarkeria matxistaren aurkako borrokan ere bai: «Protokolo berri bat abiarazi dugu hainbat jazarpen eta indarkeria kasuri aurre egiteko; EHU feminismo instituzionalaren erreferente bihurtu da». Jakinarazi dutenez, protokoloaren bidez, 2018-2019ko ikasturtean 24 pertsona artatu dituzte. Azkenik, errektoreak azaldu du Arrakasta programari esker posible izan dela «babes sistemetatik igarotako» zenbait gazte unibertsitatera sartzea.

Kanpoan, mobilizazioak

Fakultatearen kanpoaldean protestak izan ziren nagusi. LAB sindikatua, Ikasle Abertzaleak eta unibertsitateko langileak elkartu ziren. LABek, besteak beste, salatu du EHUko langileen %60 behin-behineko kontratuarekin ari direla lanean. «Bestelako unibertsitate eredu bat» aldarrikatu dute

Ikasle Abertzaleek Ez zarete ongi etorriak lelopean egin zuten mobilizazioa, eta salatu zuten Ertzaintzak lau ikasle identifikatu zituela. Unibertsitateko garbitzaileek, berriz, lan hitzarmen «duina» izan zuten aldarri. ELA, UGT, LAB, ESKE eta CCOO sindikatuek babestu zuten protesta.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna