Kritikoak talde mistoan nahi ditu Santosek

Legealdia amaitu aurretik, hiru hilabeteko jarduna geratzen zaio Nafarroako Parlamentuari, eta oraindik ikusteko dago legebiltzarra desegin bitarteko asteotan nola eragingo duen Ahal Dugu-ren talde parlamentarioaren zatiketak. Abenduaren 20an Orain Bai ildokoek Tere Saez, Mikel Buil eta Ainhoa Aznarez ildo ofizialeko parlamentariak taldetik egozteko idatzi bat aurkeztu eta gero, Ahal Dugu-k alegazioak aurkeztu zituen herenegun Nafarroako Parlamentuko Mahaian. Eduardo Santos alderdiko idazkari nagusiak atzo eman zuen alegazioen berri, eta gogor hitz egin zuen kritikoen jokabideaz: «Norbaitek Ahal Dugu-ren talde parlamentarioa hautsi nahi baldin badu, talde mistora edo adskripziorik gabeko parlamentaria izatera igaro beharko luke».

Ser irrati katean elkarrizketatu zuten atzo Santos, eta hizpide izan zuen parlamentuko taldean azken hilabeteetan sortutako egoera. Gehiago dira kritikoak, baina Santosek uste du talde hori alderdiko ildo ofizialari dagokiola: «Ahal Dugu-ren talde parlamentarioa botoa eman ziotenei zor zaie, eta legebiltzarrak ez luke onartu behar lau transfugak erabakitzea 26 parlamentarik bozkatutako presidentetzaren inguruan». Izan ere, Aznarez parlamentuko lehendakaria izanik, Orain Baikoen erabakiak ondorio bat eragin lezake: Aznarezek presidente izateari uztea eta aldaketaren aldeko indar politikoek gehiengoa galtzea legebiltzarreko mahaian.

Argudio horiek erabili ditu Ahal Dugu-k alegazioetan, eta «zentzuzkotzat» jo ditu Santosek: «Uste dugu zentzu komunean militatu behar dela, ez surrealismoan. Parlamentuaren presidentetza aldaketaren gobernuari buruzko akordioaren parte izan zen, eta horri eutsi beharko litzaioke».

Mahaiaren bilera, etzidamu

Beraz, Santosek Geroa Bai, EH Bildu eta Ezkerrako bazkideen teilatuan utzi du pilota. Azaldu duenez, horiekin «aspaldi» ari da hizketan, «eta lau pertsona horiek —Laura Perezek, Fanny Carrillok, Ruben Velascok eta Carlos Cousok— sortu duten krisi instituzionalari buruzko kezka partekatua da». Hortik aurrera, «denek jokatu behar dute demokraziak kasu honetan eskatzen duen ardurarekin», Santosen esanetan: «Hemen aldaketaren gobernu bat dago, erakundeei egonkortasuna eman behar diena, eta egonkortasun horrek beharrezkoa du edozeinek uneren batean eta onura pertsonalengatik egin ditzakeen maniobrak indargabetzea».

Parlamentuko Mahaia eta Bozeramaile Batzordea datorren asteartean batzartuko da, eta litekeena da bi ildoek aurkeztu dituzten idatziak egun horretan aztertzea. Ahal Dugu-ren krisia «aldaketarentzat arazo bat gehiago» izan daitekeelakoan, Santosek espero du «denak gai» izatea egoera konpontzeko.