Presoen harrerak «gune itxietan» egitearen alde hitz egin du Foro Sozialak

Asteburuko harreren gisakoak «zatiketarako elementu» direla uste dute, eta «min erantsia» biktimentzat. Okertzat hartu dute auzibidera jo izana
Jose Jabier Zabaleta <em>Baldo</em> preso ohiari Hernanin larunbatean egindako harrera.
Jose Jabier Zabaleta Baldo preso ohiari Hernanin larunbatean egindako harrera. JON URBE / FOKU Tamaina handiagoan ikusi

Garikoitz Goikoetxea -

2019ko abuztuak 1

Zeresana eragin dute joan den asteburuan bi euskal presori kartzelatik atera ondoren egindako harrerek. Alderdi gehienek irmo hitz egin dute horrelako ekitaldi publikoen aurka, eta Foro Sozialak ere auzitan jarri du ongietorri horien moldea. Eragile politikoen erreakzioak ikusita, sumatu du «zatiketarako elementu» bihurtu direla ekintza horiek, eta kezka agertu du: «Arriskuan jartzen dituzte presoen alorrean dauden kontsentsuak». Hori saihesteko asmoarekin, Foro Sozialak eskatu du preso ohiei ez diezaietela ekitaldi publikoen bitartez egin harrera, baizik eta «gune itxietan».

Gipuzkoan egin zituzten asteburuan bi ekitaldi. Bat, larunbatean, Hernanin: Jose Jabier Zabaleta Baldo presoari egin zioten ongietorria. 29 urte egin ditu preso —besteak beste, Zarautzen (Gipuzkoa) bost lagun hil zituen eraso bat egotzi zioten—. Bestea, Oñatin, Xabier Ugarte askatu zutela eta. 22 urteko espetxealdia bete du Ugartek —Jose Antonio Ortega Lara espetxe funtzionarioa bahitzea leporatu zioten, besteren artean—.

Harrera ekitaldi horiek «min erantsia» izan dira ETAren biktimentzat, Foro Sozialak ohartarazi duenez. «Hala jakinarazi digute espresuki». Presoen senideek ere «ezinegona» agertu diete: «Gai honek areagotu egiten du haien babesgabetasun sentsazioa». Atzerapausoa ikusi dute, beraz. «Euskal jendarteak ez du onartzen min gehiago eransten jarraitzea jada pilatutako sufrimenduei».

Presoak espetxetik ateratzen direnean nola jokatu, adostasun batzuk badaude, Foro Sozialaren esanetan. Batetik, harrera egitea, bai, baina leku itxietan: «Kaleratzeek presoen senideengan eta ingurune hurbilean eragiten duten pozarekiko errespetuz, eragileak bat datoz ongietorriak espazio itxietan egiteko aukerarekin». Bestetik, biktimei errespetua izatea: «Biktimen minarekiko errespetu osoa, bai eta egia, justizia eta erreparaziorako duten eskubidearekiko». Adostasunak akordio batera eramateko premia ikusten du Foro Sozialak: «Akordio horren zutabe izan behar dira salbuespeneko egoera amaitzea, espetxe lege arruntak ezartzea, eta presoek eragindako mina onartzea». Areago, ohartarazi dute ez litzatekeela halako ekitaldirik izango euskal presoek ohiko kartzela legedia balute, inguruarekin ohiko erlazioa izango bailukete.

Harreren harira Ertzaintzak ez du atestaturik egin, ez baitu deliturik sumatu. Espainiako Gobernuak, ordea, fiskaltzara jo du, eta Espainiako Auzitegi Nazionalean ere badira salaketak. Foro Sozialak dio bide antzua dela. Hori ez, adostasunak sendotzea eskatu du: biktimen mina errespetatzea, presoen senideen sufrimendua aitortzea, eta preso ohiek «ekarpena» egitea bizikidetzaren alde.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Jendea terrazetan Bilbon, astelehenean. ©Aritz Loiola/FOKU

651 kasu atzeman dituzte Hego Euskal Herrian

Berria

Bizkaian kasu gehien atzeman diren eguna izan da: 402. Osasun Saila eta Bizkaiko Foru Aldundia arratsaldean bilduko dira egoera aztertzeko.

 ©JON URBE / FOKU

«02:00etan, festak ezin du segitu eremu pribatuetan»

Aitor Biain

Herritarren parte hartze handiagoa eskatu dute ostalariek, ardura guztia beren bizkar izan ez dadin. Ataka estuan direla ohartarazi dute, eta babes ekonomikoa galdegin diote administrazioari, helegitea onartu edo ez.

Donibane Lohizuneko plaza, konfinamendu denboran ©Bob Edme

Donibane Lohizuneko ostatu bat hetsi dute

Ekaitz Etxamendi

Pirinio Atlantikoetako departamenduko prefekturak erabaki du Donibane Lohitzuneko (Lapurdi) Le Miam ostatuaren hestea, bost egunez zigor gisa. Neurria beterik, gaur ireki dute berriro.

Osasun langileak PCR probak egitn Donostian, iragan astean. ©Gorka Rubio/FOKU

Getxoko Bikain tabernan izan zirenei proba egiteko eskatu die Jaurlaritzak

Berria

Abuztuaren 2tik 10era bertan egon zirenek egin beharko dute testa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna