Noiz sortua: 2020-05-23 00:30:00

Gas isuriak %4 murriztu ziren Araban, Bizkaian eta Gipuzkoan 2018. urtean

Hala ere, murrizketak ez zuen berdindu aurreko urtean izandako gorakada. Arriola: «Ekonomia modu jasangarrian suspertu behar da»
Auto ilarak, Errenterian (Gipuzkoa).
Auto ilarak, Errenterian (Gipuzkoa). ANDONI CANELLADA / FOKU Tamaina handiagoan ikusi

Gotzon Hermosilla -

2020ko maiatzak 23

Eusko Jaurlaritzako Ingurumen Sailak ezagutarazi ditu Arabako, Bizkaiko eta Gipuzkoako 2018ko datuak berotegi gasen isuriari dagokionez. Positiboak dira datuak: hiru herrialdeetan gas horien isuria %4 murriztu zen aurreko urtearekin alderatuta. Hala ere, murrizketak ez du lortu aurreko urtean izandako gorakada berdintzea, 2017an isuriak %5,45 ugaritu baitziren. Edonola ere, Ingurumen Sailak nabarmendu du igoera hura «abaguneari lotutakoa» izan zela eta orain «beheranzko bidera» itzuli direla hiru herrialdeak.

Iñaki Arriola sailburuak nabarmendu du 2018ko jaitsiera hura «hazkunde ekonomikoko testuinguru batean» gertatu zela, urte hartan BPG barne produktu gordina %3 hazi baitzen; ekonomia hazi izanagatik ere berotegi gasen isuria 20 milioi tonen langaren azpitik gelditu izana 18,9 tona isuri ziren lorpen handitzat jo du.

Elena Moreno sailburuordeak sektoreka aletu ditu isurien datuak. Esan duenez, murrizketarik handiena industria eta energia sektoreetan izan da, eta, neurri apalago batean, garraioarenean. Datu hori nabarmendu nahi izan du: izan ere, hiru sektore horiek dira berotegi gas gehien isurtzen dutenak, isuritako guztiaren %86 zehazki: %34 energiaren sektoreak, beste %34 garraioarenak, eta %18 industria sektoreak.

Energiaren sektorean, isuriak %5 gutxitu dira, eta industriarenean, berriz, %9. Azken datu hori bereziki azpimarragarria da, Morenoren esanetan, kontuan izanda sektore horrek Araban, Bizkaian eta Gipuzkoan duen garrantzia, eta azken urteetako joerari segida ematen diolako: esan duenez, 2005etik isuriak %38 jaitsi dira. «Horrek agerian uzten du sektore horretan gertatu den eraldaketa», esan du.

Garraioan, «kezka»

Garraioan ere gas gutxiago isuri dira, baina %1 gutxiago baino ez. Gainera, Morenok azaldu duenez, garraioarena da Jaurlaritzari «kezka» eragiten dion arloa eta «etorkizunerako gakoa», gas isurien arazoa konpondu nahi bada: isuri iturririk handienetan bigarrena da, eta 2005etik %15 igo da. Batez ere, errepideari lotutako garraioa da ardura gehien sortzen duena, eta etorkizunean horri oratu beharra nabarmendu du Morenok.

Bizitegi eta zerbitzuen sektorean, berriz, berotegi gasen isuriak %5 gehitu ziren 2018an, etxeetako gas naturalaren eta petrolioaren deribatuen kontsumo handiagoaren ondorioz. Morenok garrantzia kendu dio horri, sektore horiek oso pisu txikia dutelako isurketetan: isuritako gasen %7 baino ez dira.

Pandemiaren ondorioak

Oraindik denbora beharko da 2019 eta 2020ko datuak eskuragarri izateko, baina begien bistakoa da COVID-19ak ekarritako konfinamenduak eta jarduera guztien etenaldiak eragina izango dutela berotegi gasen isurian ere. Iñaki Arriolak aurreratu duenez, isuriak %20 inguru murriztu ziren martxoan, eta %40 apirilean.

Orain, berriz, ekonomia suspertzeko neurriak iragartzen ari diren honetan, arriskua dago klima aldaketaren kontrako jardunbidea bigarren mailan gelditzeko. «Beharrezkoa da ekonomia suspertzea, baina modu jasangarrian egin beharko genuke hori», esan du Arriolak, eta iragarri du kanpaina bat abiaraziko dutela ideia hori gizarteratzeko.

Jaurlaritzaren helburua da 2030erako isuriak %40 gutxitzea, eta 2050erako %80, 2005ekoekin alderatuta.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan hamar lagun hil dira COVID-19 gaitzaren eraginez. Zortzi positibo atzeman dituzte PCR probekin, eta bost gaixo ospitaleratu dituzte. Euskal Herrian 29.491 gaixok eman dute positibo guztira, koronabirusa atzemateko probaren bat eginda. Horietatik 2.078 hil dira. Grafikoak, albiste barruan.

Maria Txibite, Manu Aierdi eta Elma Saiz kontseilariekin parlamentutik ateratzen. ©Idoia Zabaleta, Foku

Bortzgarren neurri sorta onartu du Nafarroako Parlamentuak

Berria

Navarra Sumaren abstentzioarekin eta bertze alderdi guztien baiezko botoarekin onartu dituzte neurriak. Bertzeak bertze kultura ogibide dutenentzat 50.000 euro arteko diru laguntzak onartu dituzte eta hamabi hilabetez luzatuko dituzte autonomoentzako eta aldi baterako lan erregulazioan daudenentzako alokairua ordaintzeko diru laguntzak. 

Elkarrizketa: Ana Galarraga eta Miren Basaras

«Zabaltzen jarraitu behar dugu ez dakigula benetan zer gertatuko den»

Jakes Goikoetxea

Asko dakite SARS-CoV-2 birusari eta COVID-19aren izurriteari buruz, baina, asko jakinda ere, zuhurtziaz jokatzen dute, ez baitakite zer gertatuko den epe laburrean eta luzera begira.

Behobiako zubia, Irun eta Hendaia artean, itxita. ©Andoni Canellada / Foku

Ekainaren 22an zabalduko dute Ipar eta Hego Euskal Herriaren arteko muga

Jon O. Urain

Reyes Maroto Espainiako Industria ministroak eman du dataren berri. Ia hiru hilabete daramatza itxita, eta itxierak eragozpen ugari eragin dizkie zonalde horietan bizi diren herritarrei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna