Albistea entzun

Arrauna. Jose Luis Korta. Kaikuko entrenatzailea

«Kontxa aurretik egin beharko litzateke igoerako kanporaketa»

Kaikuren denboraldiari «ginga» jarri nahi dio Kortak, Eusko Label ligarako igoera lortuz. Kanporaketa horri begira, aurkariekiko erreferentziak eguneratzeko erabiliko du Kontxako sailkatze estropada.
JUAN CARLOS RUIZ / FOKU Tamaina handiagoan ikusi

Iñaki Berastegi -

2021eko abuztuak 26

Iaz galdutakoa berreskuratzea du helburu Jose Luis Korta Kaikuko entrenatzaileak (Orio, Gipuzkoa, 1949); hau da, Bizkaitarra datorren denboraldian Eusko Label ligan aritzea. Ligako azken estropadan hiru aste barru jokatuko den igoerako kanporaketarako sailkatu eta gero, mailaz igotzea «zaila» baina «erronka polita» izango dela uste du taldeko prestatzaileak: «Tiran da faboritoa. Haren atzetik Getaria eta gu gaudela uste dut». Aurrez, Kontxako sailkatze estropadan parte hartuko dute, gaur zortzi.

Ligako azken estropadan lortu zenuten kanporaketarako sailkatzea, Pedreña gainditu eta bandera irabazita. Lehendabiziko helburua bete duzue?

Aste polita izan da. Castroko lehen estropadan kale egin eta gero, zaila geneukan, baina sailkapena iraultzea lortu dugu azkenerako. Lehenengo helburua, sailkatzea, bete dugu, eta, orain, ea kanporaketan zer gertatzen den.

Liga Getariaren atzetik amaitu arren, azken hiru banderak irabazi dituzue. Oso ondo amaitu duzue liga.

Bai, azken zazpi estropadetatik bost irabazi ditugu. Banderak irabazteak morala ematen du, eta mutilak jabetu dira ez direla besteak baino gutxiago. Horrez gain, egin ditugun aldaketekin ere asmatu dugu. Getaria izan da erregularrena; hasieran eta amaieran ondo moldatu da, eta ez da erraza izango haiek menderatzea: erregularrak dira, ondo egiten dute arraunean eta talde ona dute, etxekoa. Ahaleginduko gara, baina TKE ligakoek ere maila handia dute. Urtero talde batek galtzen du, gutxienez; maila galtzea Zarautzi tokatu zaio, baina esango nuke, egun, Enbata gure aurretik legokeela. Tiran da faborito, eta haren atzetik Getaria eta gu gaude bigarren postuaren borrokarako. Meira eta Bueu gure atzetik daudela iruditzen zait.

Dena den, kanporaketaren aurretik, Kontxako sailkapen estropada duzue. Entrenamendu gisa baliatuko duzue ala sailkatzeko aukerekin ikusten duzu taldea?

Iruditzen zait aukera gutxi dugula sailkatzeko, eta, beraz, entrenamendu gisa erabiliko dugu. Ahaleginduko gara ahalik eta estropada onena egiten, eta, bide batez, ikusiko dugu Tiranekin eta galiziarrekin alderatuta non gauden. Galtzeko gutxi eta irabazteko asko daukagu.

Meira eta Bueu galiziarrak ikusteko aukera ona izango da. Jada ikuskatzaile lanak egin dituzu bi ontzi hauekin?

Ez, nire lanean buru-belarri jarrita nagoelako. Gure onena ematen badugu, gertu ibiliko gara. Datorren osteguneko estropadak balioko digu tarteak txikiak edo handiak diren jakiteko, eta noren aurretik edo noren atzetik gauden ikusteko. Ligako azken estropadan, Bilbon, denbora ona egin genuen, eta iruditzen zait TKEko traineru batzuek ere lanak izango lituzketela denbora hori hobetzeko.

Iaz, maila zuzenean galdu zuen Kaikuk. Klubaren tokia Eusko Label ligan dago?

Bai, iruditzen zait Kaikuk hor egon behar duela. Ez da erraza. Pentsa KAE 1 ligan zenbat talde dauden gorengo mailan aritutakoak: Kaiku, San Juan, San Pedro, Zumaia, kantabriarrak... TKEko mailak gora egin du, baina azpiko mailetakoak ere bai. Iritsi garen tokira iritsita, helburua maila nagusira itzultzea da. Klubaren asmo nagusia ere hori da.

Denboraldiaren bigarren erdian ikusi da Kaikurik onena. Zergatik?

Maila galdu eta gero, jende berri asko ekarri zen. Ez da erraza puska horiekin guztiekin talde bat osatzea. Onenak ekarrita ere ez da erraza maila galdu eta berehala igoera lortzea. Zuzendaritza eta entrenatzailea ziur saiatu zirela, zituzten aukeren barruan, ahalik eta talde indartsuena osatzen. Hasieran kosta egin zen, baina orain, kanporaketarako sailkatuta, lehen pausoa eman dugu, eta igoerarekin ea ginga jartzen diogun denboraldiari. Ez da erraza izango.

Hilabete atzera sartu zinen Ruiz Camus entrenatzailearen talde teknikoan, eta egun gutxiren buruan entrenatzaile nagusi izendatu zintuen zuzendaritzak. Nola baloratzen duzu aste hauetako zure lana?

Banderak irabazita eta lehen helburua lortu dugula jakinda, gustura nago orain arte egindakoarekin. Baina arraunlariek egiten dute arraunean; gu, kanpotik, saiatzen gara gauzak mantentzen edo aldaketak egiten, traineruak ondo funtzionatzen jarrai dezan.

Zertan aldatu da Kaiku zu entrenatzaile gisa hasi zarenetik?

Etorri eta berehala, artean Ruiz Camus entrenatzaile zela, Pedreñako bandera irabazi genuen. Horren ostean izendatu ninduten lehen entrenatzaile, eta hasieran denbora gutxi izan genuen aldaketak egiteko. Nire arraunkera hartzeko, gauza batzuk aldatu nituen: postu aldaketa batzuk egin eta pisuaren banaketa ere egokitu nuen, besteak beste. Orain esan dezakegu hobera egin dugula, eta nire lana hori da. Traineru zaharrarekin lan egingo dugu asteon, eta igandetik aurrera jarriko gara Kontxa prestatzen, sailkatzeko estropadan ariko diren mutilekin. Atseden apur bat hartzeko ere baliatuko dugu, karga gutxitzeko, azken estropadetan aldaketa gutxi egin ditugulako.

Nola amaitu duzuen ikusita, kalte egiten dizue kanporaketa hiru aste barru jokatzeak? Kontxa aurretik jokatzea logikoagoa litzateke?

Arraun munduan ez dugu aurrera egiten, atzera baizik. Ni hasi nintzenetik ez dugu hobera egin. Gainera, erabakiak ez dituzte arraunaz dakitenek hartzen, dirua dutenek baizik. Nire ustez, Kontxa aurretik jokatu beharko litzateke kanporaketa. Gauza asko daude gustatzen ez zaizkidanak, baina, zerbait esaten badut... Nire zain daude. Halere, ez dut uste eten honek kalte egingo digunik.

Bermeon eta Portugaleten, eta erlojuaren aurka lehiatuko zarete maila nagusian aritzeko eskubidea ematen duten bi postuengatik. Baldintza eta eremu aproposak dira Kaikurentzat?

Aukeratu beharko banu, nahiago nuke itsasotik kanpo izatea bi estropadak. Behintzat, erlojuaren aurka izanda, kaleen artean ez da diferentziarik izango, eta ondoen egiten duten bi ontziak igoko dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Bizkaiko Batel Ligaren 7. eta 8. jardunaldiak, 2019ko martxoan. Bizkaiko arraun taldeetako 500 neska-mutil batu ziren. / ©Bermeo Arraun Argazkiak

Pandemiak moteldu egin ditu

Natalia Salazar Orbe - Bizkaiko Hitza

Bizkaiko Futbol eta Atletismo federazioek esan dute behera egin duela bi kirolotan federatu diren gazteen kopuruak. Uste dute gazteek beste ohitura batzuk hartu dituztela azken aldian, pandemiaren ondorioz. Arraunera gazte gehiagok jo dute, baina fitxa kopurua antzekoa izango da aurten ere.

Peio Etxeberria, Altuna III.aren aurkako atzoko norgehiagokan egindako tantoetako bat ospatzen. ©RAUL BOGAJO / FOKU

Oparia bere buruari

Ainara Arratibel Gascon

Peio Etxeberriak garaipen handia lortu du Altuna III.aren kontra, 18-22, eta oin eta erdi du finalerdietan. Ezkurdiak 22-15 hartu du mendean Urrutikoetxea
 ©JON URBE / FOKU

«Toki aproposenean nago ikasteko; onenekin nago»

Julen Etxeberria

Bera Berak Paris 92 hartuko du gaur Gaskan, Europako Ligako bigarren kanporaketako joaneko partidan (12:00, ETB1). Loidik estreinakoa du Europan: «Markatua nuen egun hau».

Anbizioa eta beharra

Eñaut Agirrebengoa

Osasunak esne mamitan jarraitu nahi du, gaur Vila-realen zelaian beste hiru puntu lortuta. Alavesek premiak estututa hartuko du bihar Betis

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna