Iñaki Leturia. 'Teknopolis' saioaren aurkezlea eta zuzendaria

«Arriskatu behar dugu, gauza berriak egin»

'Teknopolis' saioak zientzia modu ulergarrian eta erakargarrian azaltzeko ahalegina egiten du duela 22 denboralditik. Iñaki Leturiak uste du ikusleek saioa, ikusi baino gehiago, entzun egiten dutela.
GOTZON ARANBURU / FOKU Tamaina handiagoan ikusi

Jakes Goikoetxea -

2020ko martxoak 3

Iñaki Leturia (Ormaiztegi, Gipuzkoa, 1970) Elhuyarrek ETBrentzat egiten duen Teknopolis saioaren aurkezlea da, eta zuzendarietako bat —Nagore Rementeriarekin batera—. Saio historikoa da —22. denboraldia du—, baina berritzea du etengabeko erronka.

Zientziari buruzko ikasketarik?

Ez. Batxilergoan bai, baina gero kazetaritza ikasi nuen.

Horrek baldintzatzen edo mugatzen du zeure lana?

Dakienari eskatu behar diot azaltzeko. Babes hori behar dut.

Hala ere, aditua ez izateak behartu egiten zaitu zerorrek ulertzera, gero gainerakoei azaltzeko. Zeuk ulertzen ez baduzu, nekez ulertuko dute ikusleek.

Eta gaiak beste ikuspuntu batetik ikusten dituzu. Erreportajeetan eta saioetan nire maila jartzen saiatzen naiz, jendeak nire ikuspuntutik ulertzea, hurbiltzea. Lortu behar dugu jendeak ulertzea, mezua iristea.

Nola aukeratzen dituzue gaiak?

Adi egoten gara beti. Asko irakurtzen dugu. Jakin-mina eduki behar da, alde guztietara begiratu.

Ikertzaileek, ikerketa taldeek eta ikerketa zentroek barneratua dute interesgarria dela egiten dutena azaltzea eta erakustea? Errezeloak dituzte oraindik?

Errezeloak badaude. Oraindik ere zalantzan jartzen dute ea kazetari bat gai izango ote den egiten dutena ondo azaltzeko. Buelta emanda: zientzialaria gai izango da jendeak ulertzeko moduan azaltzeko? Beharrezkoa da egiten dutena azaltzea, baina oraindik ere gertatzen da ateren bat jo eta «zertarako?» galdetzea. Edota lan gehigarritzat hartzea. Gero eta gehiago dira, ordea, haien lana zabaldu behar dutela uste dutenak.

Teknopolis-en bereizgarrietako bat bada eguneroko bizimoduaren atzean dagoen zientzia eta teknologia erakustea. Zuek ezarritako ardatza da?

Bai. Koronabirusari buruzko programa bat prestatzen ari gara, eta ezin dugu, albistegien moduan, egun batetik bestera erantzun; baina jendeari kokatzeko balioko dion programa bat egingo dugu.

Zorroztasuna bai, eta entretenimendua?

Saioak entretenimendua ere behar du. Gai batzuk modu ludikoago batean lantzen ditugu, baina mezu batekin.

Badago joera bat zientzia ikuskizun bihurtzeko. Zuek nola orekatzen dituzue zorroztasuna, ulergarritasuna, erakargarritasuna eta entretenimendua?

Ikuskizunaren bidea baztertuta daukagu aspalditik. Zientzia erakargarri egitea erronka handia da. Edukien tratamenduan dago gakoa. Askotan esaten dut gure ikusleek entzun egiten dutela, arreta jartzen dutela. Oreka zaila da, baina edukia zaindu behar da, arreta jarri duenari lagunduz.

Mikel Alvarez BERRIAko telebista kritikariak abenduan idatzi zuen saio biribila egiten duzuela, baina agian tonua eta errealizazioa zaharkituak geratzen ari direla. Ausartagoak izan beharko zenuketela zioen. Ados?

Bai. Geu ere konturatzen gara. Urtero egiten dugun gogoeta da molde batzuk gainditu behar ditugula. Funtzionatzen duenari eustea eta aldaketatxo batzuk egitea, narrazio forma berriak probatzea. Jende asko ari da hori lortu nahian, baina gutxik lortzen dute. Hala ere, arriskatu behar dugu, gauza berriak egin, ez betikoa.

Audientziak zaintzen dituzue?

Bai. Pixka bat igo gara azkeneko hiru edo lau urteetan. Emaitzak nahiko txukunak dira.

Ordutegiak lagundu egin dizue.

Bai. Jendeak ikusteko moduko ordutegian ematen dute, eta audientzietan nabaritzen da.

22 denboraldi daramatzazue. 23.a bermatuta dago?

Ez, urtero irabazi behar da hurrengoa. Badirudi Teknopolis betirako dela, baina telebista mundua gogorra da, eta kentzea erabaki dezakete.

ETBk baliabide teknikoak soilik jartzen ditu?

Lehen, ETBk kamerak-eta ordaintzen zituen; aurten ere bai, baina orain dirutxo bat ematen digu, eta geuk bilatu behar dugu enpresa bat zerbitzu hori emateko.

ETBrentzat, beraz, merkea da Teknopolis-en moduko saio bat izatea?

Nik uste dut pagotxa dela. Gainera, prestigioa ematen dio.

Baduzue eredu gisa hartzen duzuen programarik?

Geure artean maiz aipatzen dugu Pere Estupinyaren El cazador de cerebros [Garunen ehiztaria] TVEko programa. Baina haien baliabideek ez dute zerikusirik gureekin. Hala ere, uste dut ahalegina egin daitekeela, burua nekatuta gauza duinak egin daitezkeela. Agian ez zara iritsiko haraino, baina hurbilduko zara. Hori bai, merke egin behar dugu. Bai Teknopolis-ek eta bai ETBk larre motzeko telebista egin behar dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©ENDIKA PORTILLO / FOKU

«Nire bizitzarekin komedia egitea terapia bat da»

Jone Arruabarrena

Bartzelonan bizi den arren, edonon sentitzen da etxean otxandiarra, etxea berarekin baitarama doan lekura doala: furgoneta batean bizi da. Han egiten ditu umorezko bakarrizketak ere.
 ©BERRIA

Zentzua duten akatsak

Jakes Goikoetxea

BERRIAko kazetariek tarteka laprast egiten dute egunero-egunero idazten dituzten milaka hizki eta hitzetan. Baina, batzuetan, akatsak eta deskuiduak izanda ere, okerreko hitz horiek esanahi propioa izaten dute: adierazkorragoa, gordinagoa, umoretsua, poetikoa... 'Hiztripuak' dira.
Gaur gauean emango dute <em>Hondar ahoak</em> telesailaren laugarren eta azken atala, ETB1en. ©EITB

Ezustekoekin bukatuko da 'Hondar ahoak' telesaila, gaur

Amaia Igartua Aristondo

Denbora eta aurrekontua «murritzak» izan diren arren, emaitza «ona» izan dela dio Marian Fernandez Txintxua Filmseko ekoizleak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna