Albistea entzun

'Mihiluze' ETBra itzuliko da irailean

Astelehenetik ostegunera emango dute, 21:30ean. Proba batzuk berriak izango dira, eta beste batzuk zaharrak, baina egokituak
Kike Amonarriz eta Ilaski Serrano izan ziren <em>Mihiluze</em>-ren lehen etapako aurkezleak, 2006tik 2013ra.
Kike Amonarriz eta Ilaski Serrano izan ziren Mihiluze-ren lehen etapako aurkezleak, 2006tik 2013ra. ETB Tamaina handiagoan ikusi

Urtzi Urkizu -

2022ko ekainak 25

Bederatzi urteko etenaldiaren ostean, Mihiluze lehiaketa ETB1 katera itzuliko da. Euskaldun askoren programa kutuna izan zen Mihiluze, 2006tik 2013ra, baina, zortzi denboraldiren ostean, etena iritsi zen. Orio Produkzioak ekoiztetxeak proiektua aurkeztu du lehiaketa berriro egiteko, eta ETBk baiezkoa eman dio. Unai Iparragirre ETBko zuzendariak iragarri du irailaren erdialdean hasiko direla ematen.

Kike Amonarriz eta Ilaski Serrano izan ziren lehen etapako aurkezleak —udan jakinaraziko dute zein izango diren aro berriko aurkezleak—. Amonarrizek saioan parte hartuko du, baina ez aurkezle gisa, aholkulari baizik. «Poz handia» sentitu du lehiaketaren itzulerarekin. «Saioa etetea erabaki zenean, argi genuen denok formatu horri atseden bat ematen geniola. Ez genekien betiko izango zen ala ez, baina ikusten genuen itzul zitekeenaren aukera».

Saioko zuzendaria Xabier Zapirain izango da. Maddalen San Miguel Orioko eta Mihiluze-ko ekoizle eragileak, berriz, iragarri du itzulera proiektu «anbiziotsua» izango dela: «Proba batzuk guztiz berriak dira, baina beste batzuk zaharrak dira, garai berrietara moldatuak». Edonola ere, denek eutsiko diote saioaren hasierako esentziari: «Euskararekin jolastuko dugu, umorez, ondo pasatzeko». Amonarrizek ere nabarmendu du lehen etaparen espiritua mantenduko dutela: «Lehiaketa umoretsu bat, hizkuntza ardatz izango duena, gure kultura eta nazioartekoa uztartuko dituena, eta jendeak ondo pasatuko duena, bai bertatik, bai etxetik».

Iparragirreren iritziz, garai bateko eduki bat berreskuratzean sarri gertatzen da esentzia deformatzea: «Horregatik, kontu handiz ibili gara Mihiluze berrian, espiritua eta esentzia lehengoak izan daitezen». Berrikuntzak egongo dira, hala ere. «Platoaren egituran sartuko dugu berrikuntza nagusiena», azaldu du ETBko zuzendariak. San Miguelek aipatu du irudi aldetik «berritua» iritsiko dela Mihiluze.

Beste berrikuntzetako bat Interneteko sare sozialen erabilera izango da. Programako ekoizle eragileak argi du: «Sare sozialak herritarrak gerturatzeko tresna izango dira».

Iparragirrek esan du «2022ko saio bat» izango dela, esparru digitalean ere presentzia izango duena. «Programazioan garrantzi handia izango duen edukia izango da; asko zainduko dugu. Produkzioan eta egiteko moduan mimo handiz ekingo diogu».

Amonarrizek, bestalde, nabarmendu du Mihiluze-k helburu gisa beti izan duela Euskal Herriko ahalik eta herritar gehienek parte hartzea. «Baita lurraldetasuna aintzat hartzea ere». Lehen zortzi denboraldi haietan, Euskal Herriko lurralde guztietako lehiakideak pasatu ziren saiotik, baita atzerriko euskaldunak ere —tartean Herrialde Katalanetakoak eta Amerikakoak—. «Orain ere saiatuko gara hizkera guztietako euskaldunak biltzen. Euskara ikasten ari den jendea ere erakarri nahi dugu: garrantzitsua da horiek sentitzea lehiaketan parte hartu ahal dutela».

Lehiakide bila hasi dira jada. Parte hartu nahi duenak mihiluze@orioprodukzioak.eus helbidera idatzi behar du. Amonarrizek espero du aurreko edizioetan parte hartu zuten lehiakide askok berriro parte hartzea: «Bigarren aukera bat izango dute».

«Entretenituz ikastea»

Iparragirrek, bestalde, nabarmendu du Euskal Telebistaren betebeharretako bat gizartea laguntzea eta gizarteak eskatzen duena ematea dela. «Iruditzen zait edukiek laguntzen dutela gizarte hobeago bat egiten. Eta Mihiluze-k laguntzen du gizarte euskaldunagoa egiten». ETBko zuzendaria ikasteko aukera ematen duten edukien «zale amorratua» da. «Kredituak iristerakoan, ikusleak esatea: 'Hara! Gauza pilo bat ikasi ditut, eta ez naiz konturatu, oso entretenigarria izan baita». Halako saio bat da Mihiluze. «Eta betetzen ditu ETB1eko edukiekin egin nahi ditugun gauza guztiak».

2006tik 2013ra iraun zuen etapan, 1.117 atal egin zituzten. 2.438 lehiakide pasatu ziren bertatik. Mugak ere gainditu zituen, TV3ek Bocamoll izenarekin estreinatu baitzuen formatua. Amonarrizek sortu zuen formatua 2006an, eta bere «haur bat bezala» sentitzen du. «Harrotasunez hartzen dudan albistea da itzulera».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©ANDONI CANELLADA / FOKU

«Hiriaren identifikazio bilakatu dira erraldoiak eta buruhandiak»

Joseba Arratibel Ladron

Muñozek tradizioari eutsi nahi dio Donostiako erraldoi eta buruhandiekin, eta, hori gal ez dadin, liburu batean dena biltzea erabaki du, beste 40 urte bete ditzaten, baita konpartsak beste 25 ere.
Bi neska, puntu morean informazioa eskatzen, atzo. ©IÑIGO URIZ / FOKU

Puntu eder bat orbanen artean

Enekoitz Telleria Sarriegi

Indarkeria sexistaren aurka jarritako puntu moreak oso harrera ona izan du jendearen artean. Bulebarreko artatze gunea «erreferentziazko babes espazio» bihurtu dela diote han ari direnek.
1 ©JON URBE / @FOKU

Itsasargia izan da testigu

Miren Mujika Telleria

Mendikateak baino gehiago, itsasertzak lotu zituen Zetak taldea eta entzuleak. Izan ere, taldearen kantu bakoitzak goraino bete zuen Sagueseko plaza, gau giro ederrean. Zetak taldeak ez ezik, beste zenbait musika estilok eta taldek ere girotu zuten Donostia asteartean: La Jodederak, Miau DJak eta Ainhoa Larrañagak.
Anunnaki etxeko vogue dantzariak Iruñeko Alde Zaharrean, joan den urrian, Labak antolatutako bestan. ©IÑIGO URIZ / FOKU

Euskal mitologiaren ibiltokia

Iker Tubia

Euskal kulturako kondairak gai hartuta, 'vogue' erakustaldi eta txapelketa eginen dute Burlatan. 'Voguing' kultura ikusarazi nahi dute. Atzerriko 'ballroom' eszenako kideak ere ariko dira

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...