Albistea entzun

DAB irrati digitaleko emankizunak etzi iritsiko dira Euskal Herrira

Lapurdiko kostaldean entzun ahalko dira hastapenetan. Euskarazko irrati batzuk ere ariko dira
DAB audio emankizun digitalak entzuteko, irrati aparailu bereziak behar dira.
DAB audio emankizun digitalak entzuteko, irrati aparailu bereziak behar dira. GOIZEDER TABERNA Tamaina handiagoan ikusi

Urtzi Urkizu -

2023ko ekainak 28

FM bidezko irratian oraindik ez da aldaketarik izango Euskal Herrian, baina aste honetan aurrerapauso garrantzitsu bat emango da irratiaren eremuan: lehen aldiz, DAB edo DAB+ audio transmisio digitalak abiaraziko dira (digital audio broadcasting). Lapurdiko kostaldean entzun ahalko dira aurreneko emanaldi digitalak, ostiraletik aurrera. Esleitze bat tokiko Baionari dagokio, eta beste bat Baiona zabalari —Lapurdiko eremu handiagoa hartzen du—, baina lehen hilabeteetan soilik Lapurdiko kostaldean entzungo dira emankizunak. Geroago zabalduko dira Lapurdi osora, Nafarroa Beherera eta Zuberoara. Irrati aparailu berri bat behar da emankizun horiek entzuteko; auto berri gehienek ere badakarte irrati digitala entzuteko tresna.

DABak irrati seinale analogikoak ditu jatorrian, eta digital bihurtzen dira. Baina ez da Internet bidezko irratiarekin nahastu behar. Hala, FMren tankerako frekuentziak erabiltzen ditu.

Christophe Betbeder Irrati Libreen Frantziako Sindikatu Nazionaleko ordezkari nagusiak nabarmendu du «irrati eskaintza potentzial berri bat» iritsi dela. Eta eragina izango du eskaintzan. «Irrati digitalean 26 irrati kate egingo dira, eta horietatik hemezortzi orain arte ez ziren presente Euskal Herrian».

Horietatik batzuk proiektu berriak izango dira: Surf FM, Mediabask irratia —irailean hasiko dute programazioa—, Kultura Antxeta... Aitziber Zapiain Antxeta irratiko koordinatzaileak azaldu duenez, Antxeta irratiak eta Kultura Radiok elkarlanean sortu dute Kultura Antxeta. «AIRK irratia deituko diogu. Zehaztasun handiagoarekin hurrengo ikasturtean hasiko gara. Egokitzapen aste batzuk ditugu orain, eta irailean programazio osoa eskainiko dugu». Kulturari eta aktualitateari lotutako magazinak eskainiko dituzte, euskaraz. Euskal Irratien parte da Antxeta, eta, hain zuzen ere, Euskal Irratiek irailean abiaraziko dute emanaldi digitaletara bideratutako programazio berezitua.

Baiona zabala deituriko esleipenean, France Bleu Urdin Euskal Herri Irratiak lehentasunezko frekuentzia digitala du. Betbederrek azaldu duenez, badira Frantziako irrati batzuk orain arte Ipar Euskal Herrian FMan entzuten ez zirenak, eta horiek orain DAB eskaintzan egongo dira.

FMa gelditzeko galdera

Betbederrek argitu duenez, oraingoz DAB emankizun digitalek ez dute inolako eraginik izango FM bidezko emanaldietan. «FMak lehen bezala segituko du». Baina susmoa du urte honen amaieran Paristik erabakiren bat irits daitekeela. «FMaren gelditzearen galdera pausatuko da. ARCOM Frantziako ikus-entzunezko komunikazio numerikoaren erakunde arautzailea Irratiaren Liburu Zuria idazten ari da, eta galderetako bat da ea FMa noiz gelditu behar den».

Beste datu bat bada: 2020. urtetik aurrera, Frantzian eta Iparraldean ekoitzi eta saldutako auto guztiek DABa hartzeko irratiak izan behar dituzte.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

EITBko irratiko langileen protesta ilaren 14ean, Eusko Legebiltzarraren aurrean, greba dela-eta. ©ENDIKA PORTILLO / FOKU

Bigarren greba eguna egin dute EITBko irratietan

Beñat Mujika Telleria

Hilaren 14an gertatu bezala, ez dira saiorik ematen ari. Soilik musika eta albistegiak ari dira ematen.

 ©JAIZKI FONTANEDA / @FOKU

«Nik hazten eta hezten ditut nire txakurrak»

Maixa Utrera Puelles

Artzain txakurren munduko txapelketan txapeldunorde izan da taldeka. Border collieetan espezialista da, eta uste du «berezko gaitasuna» dutela artzaintzarako, nahiz eta beste arraza askok ere balio duten.
Emakume bat babesteko betaurrekoekin. ©CC0

Benetan babesten al dute betaurreko babesleek?

Unai Etxenausia

Pantailen argi urdinetik begiak babesteko betaurrekoek ez dute frogatu begietako nekearen aurkako propietaterik, ezta loaren kalitatearen aldeko propietaterik ere. Melbourneko Unibertsitateko ikertzaile talde batek azterketa zientifikoa egin du, eta aldizkari batean publikatu dituzte ondorio horiek.

Uxue Rey eta Ane Eslaba, <em>Berria FM</em> podkast feministaren gidariak ©MENDI URRUZUNO

Bihar itzuliko da 'Berria FM'

Beñat Mujika Telleria

Uxue Reyk eta Ane Eslabak jarraituko dute gidari lanetan, eta bi astean behin entzun ahalko da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoari esker, gure funtzioa betetzen jarraituko dugu egunero:
jendearen galdera eta kezkekin bat egingo duen kazetaritza bat egiten.