Albistea entzun

Letraduek geldialdi mugagabeari ekin diote Hego Euskal Herrian

Soldatak igotzea eta «negoziazio kolektibo propioak» izatea eskatzen dute grebaren bidez. Eremu guztietan ez du erantzun bera izan grebak
Nafarroako Justizia Jauregia.
Nafarroako Justizia Jauregia. VILLAR LOPEZ / EFE Tamaina handiagoan ikusi

Isabel Jaurena -

2023ko urtarrilak 25

«Justizia geldituko dugu, gure eskuetatik ia epaitegi osoa pasatzen da eta». Horrela mintzatu da Adriana Obispo EAEko Justizia Administrazioaren Letraduen Batasun Progresistaren ordezkaria greba mugagabeaz. Azaldu du urte anitz daramatzatela Espainiako Justizia Ministerioak zerbait egiteko zain, baina ez dela ezer gertatzen. Geldialdia Araban, Bizkaian, Gipuzkoan eta Nafarroan izanen da. «Duela urte eta erdi aldizkako geldialdiak egiten hasi ginen, eta, horien bidez, akordio batzuk lortu genituen ministerioarekin. Baina inoiz ez dira bete; horregatik erabaki dugu geldialdi mugagabe bat hastea».

Bi eskakizun nagusi dituzte letraduek: soldatak igotzea eta «negoziazio kolektibo propioak» izatea. Lehenbizikoari dagokionez, Obispok dio 2009an epaileei konpetentzia batzuk kendu zizkietela, eta letraduei eman; baina lan horiek inoiz ez dizkietela ordaindu. Gainera, funtzionario publikoak taldeka sailkatzen dira A1, A2, B, C1 eta C2. Obispok erran du letraduak A1 taldean daudela, eta gutxien kobratzen dutenak direla multzo horretan.

«Negoziazio kolektibo propioak» dira letraduen bigarren eskakizuna. Sindikatu interprofesionalek ordezkatzen dituzte profesional horiek eta, aldi berean, Justizia Administrazioko bertze funtzionarioak. Tartean «aurkako interesak» daudela dio Obispok: «Ministerioak gure alde eskaintzen duen guztia baztertzen dute, eta, gure ordezkaritza dutenez, ez zaigu ezer iristen».

Letraduen hiru elkartek deitu dute geldialdira: Justizia Administrazioko Letraduen Elkargo Nazionala (CNLAJ), Justizia Administrazioaren Letraduen Batasun Progresista (UPSJ) eta Justizia Administrazioaren Letraduen Elkarte Independentea (AINLAJ). Obispok azaldu du talde horien helburua ez dela «herritarrei eta epaitegietan egunero lan egiten dutenei kalte egitea». Beren aldarrikapenak betetzea bertzerik ez dute nahi: «Ministerioaren erantzunaren zain gaude; ez du greba batzordearekin bildu ere egin nahi izan».

Gogoratu du, baina, geldialdiak ondorio nabarmenak izanen dituela, letraduen figura bereziki garrantzitsua delako. «Epaiketak epaileak egiten baditu ere, guk gure fede publikoarekin ziurtatu behar dugu auzi saioa modu zuzenean egin dela, aparteko gorabeherarik gabe. Guk auzi saio hori ezin badugu onetsi, ez du eraginik, eta bertan behera gelditu beharko du». Hortaz, epaiketa anitz egin gabe geldituko dira grebak dirauen bitartean, kasu jakin batzuekin zerikusia duten horiek izan ezik. Adingabeekin eta espetxeratuekin lotura dutenak, erraterako.

Epaiketekin lotutako ondorioez gain, banakoei egiten zaizkien ordainketa judizialak ere bertan behera geldituko dira —elikadurarekin eta zorrekin zerikusia dutenak, adibidez—. Altxor publikoari egiten zaizkion ekarpenak ere ez dira egingo —isunak, erraterako—. Letraduek baitute sarbidea Gordailuen eta Kontsignazio Judizialen kontura.

UPSJk adierazi duenez, geldialdiaren lehenbiziko egunean nabarmen aldatu da erantzuna eremuaren arabera: Araban %70, Bizkaian %51, Gipuzkoan %30 eta Nafarroan %40. Ministerioak bertze datu batzuk zabaldu ditu: Araban, Bizkaian eta Gipuzkoan %23ko erantzuna, eta Nafarroan %18koa. Orokorrean, lehen auzialdiko epaitegietan nabaritu ziren gehien grebaren ondorioak. Ondorio gutxien jasan zituztenak, berriz, gizarte arlokoak izan ziren.

Ministerioaren erantzuna

Antonio Rodriguez Justiziako Estatu idazkaria greba mugagabeaz mintzatu zen atzo. Haren erranetan, letraduek egiten duten «edozein erreklamazio lekuz kanpo dago». Azaldu zuen profesional horiek soldata igoerak izan dituztela, eta «beren mailan hobekien kobratzen dutenak» direla. Gehitu zuen geldialdiak «motibazio politikoak» dituela soilik, eta «herriaren kontrakoa» dela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Hiru lagun Lezetxikin, urtarrilaren 28an, AHTaren tunela atzean dutela. ©Besaide mendi elkartea

AHTaren tunel bat Lezetxiki barruan egin dutela salatu dute

Paulo Ostolaza

Euskal Herriko giza aztarnarik zaharrenak topatu diren lekua da Arrasaten (Gipuzkoa) dagoen kobazulo hori. Arrasate inguruko espeleologia zaleen talde batek egin du salaketa.

Maite Peña Gipuzkoako Gizarte Politikako diputatua, artxiboko irudi batean. ©BERRIA

Nazioartean bilatzen ari dira Donostian «lapurturiko» umea

Berria

Foru Aldundiaren tutoretzan ordu batzuk zeramatzanean eraman zuten haurra. Ama biologikoak eraman zuela uste dute

Eraso homofobo bat salatzeko elkarretaratzea, artxiboko irudi batean. ©Marisol Ramirez / Foku

Eraso homofobo bat salatu dute Barakaldon

Berria

Barakaldoko Udalak jakinarazi du asteburuan izan zela erasoa. Elkarretaratze bat egingo dute bihar.

Bidaiari batzuk, Donostiako autobus geltokian. ©GOTZON ARANBURU

Ibilbide luzeko autobusak doakoak dira jada Hego Euskal Herrian ohiko bidaiarientzat

Jone Arruabarrena

Bidaiariek fidantza bat ordaindu beharko dute, eta gutxieneko bidaia kopuru bat egiten dutenean itzuliko zaie dirua

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...