EAJk hautagaiak iragarri ditu: Mendoza Gipuzkoan, eta Artolazabal Gasteizen

Zalantzak eta zurrumurruak uxatu ditu EAJk. Arratsalde bakarrean iragarri zituen atzo Gipuzkoako ahaldungaiaren, Arabakoaren eta Gasteizko alkategaiaren izenak: Eider Mendoza, Ramiro Gonzalez eta Beatriz Artolazabal.

Izen dantza ibili da Gipuzkoan azken egunetan, jakina baitzen Markel Olano Gipuzkoako ahalduna ez zela berriz aurkeztuko kargurako, eta EAJk emakume bat proposatuko zuela haren ordez. Aurreratu zuen berripaper honek aukera gehien Mendozak zuela, eta atzo arratsaldean baieztatu zuen Gipuzkoako Buru Batzarrak. Bi ezaugarri nabarmendu zizkion hautagaitza arrazoitzean: batetik, «gaitasun profesionala eta politikan eta erakundeetan eskarmentua» izatea, eta, bestetik, «EAJko taldearen sendotasuna» izatea, «euskal lurralde gisa Gipuzkoako aurrerabidea bultzatzeko» eta «gipuzkoarren ongizatea eragiteko proiektu politikoa betetzen jarraitzeko, garapen ekonomikoan, justizia sozialean eta burujabetza politikoan oinarrituta». Gipuzkoako Foru Aldundiaren bozeramailea da egun Mendoza. Hala da 2019tik. 2001 eta 2011 bitartean EAJko legebiltzarkide izan zen Gasteizen, eta, urte horretatik aurrera, batzarkide izan da Gipuzkoan.

Jakin-mina zegoen EAJren Gasteizko alkategaia nor izango zen jakiteko ere, are gehiago goizean Gorka Urtaranek iradoki ostean ez zuela karguan segituko. Arratsaldean bilera egin ostean jakinarazi zuen Arabako Buru Batzarrak Beatriz Artolazabal Eusko Jaurlaritzako Berdintasun, Justizia eta Gizarte Politiketako sailburua izango dela alkategaia. Ahaldungai izateko, berriz, egungo bera proposatu du EAJk: Ramiro Gonzalez.

Batzar Nagusietako lehendakarigaiak ere aurkeztu zituen EAJk: Xabier Ezeizabarrena Gipuzkoan, eta Irma Basterra Araban.