Eider Rodriguezek eta Lander Garrok lortu dute Etxepare itzulpen saria

Eider Rodriguezek (Errenteria, Gipuzkoa, 1977) eta Lander Garrok (Errenteria, Gipuzkoa, 1975) irabazi dute EtxepareLaboral Kutxa itzulpengintza sariaren seigarren edizioa. Rodriguezek berak idatzitako Bihotz Handiegia (Susa, 2017) liburuaren gaztelaniazko itzulpena saritu du epaimahaiak. Bartzelonako Random House argitaletxeak argitaratu du itzulpena Un corazón demasiado grande izenpean.

Epaimahaikideek itzulpenaren kalitateaz gaindi, itzulpena jatorrizko obrarekiko leiala dela nabarmendu dute: «Itzulpena ona da, eta, hein batean, autoitzulpena izanagatik ere, idazleak ez du aukera aprobetxatu beste bertsio bat egiteko». Gainera, argitaletxeak egin duen sustapen lana ere goraipatu dute, «aberatsa» eta «trinkoa» izateagatik.

Inaxio Garro Laboral Kutxako Euskara arduradunak, Garbiñe Iztueta Etxepare Euskal Institutuko Euskararen Sustapenerako eta Hedapenerako zuzendariak, Koldo Biguri EHUko irakasle eta EIZIEko kideak, Elizabete Manterola EHUko irakasle eta EIZIEko kideak, Kizkitza Galartza Etxepare Euskal Institutuko Literatura teknikariak eta Lide Hernando Etxepare Euskal Institutuko Komunikazio teknikariak osatu dute epaimahaia. 4.000 euroko saria jasoko dute sarituek; erdia beraientzat eta erdia argitaletxearentzat, sustapenean segitzeko.

2015ean sortu zuen Etxepare Euskal Institutuak itzulpen saria, eta, geroztik, galegorako, japonierarako, ukrainerarako, ingeleserako eta katalanerako itzulpenak saritu dituzte.