Gastronomia

Kroketa tradizionalak, ukitu berezi batekin

Tokiko ohitura gastronomikoei jarraika, Patxi Ruiz de Samaniegok eta Juan Gilek kroketak egitea erabaki zuten. Martxoan jarri zuten martxan 'Kroketak.eus' proiektua, eta, orain, zapore berriak lantzeko asmoa dute.

Juan Gil eta Patxi Ruiz de Samaniego, proiektuko kideak. RAUL BOGAJO / FOKU.
Amaia Ramirez de Okariz Kortabarria.
Gasteiz
2021eko ekainaren 26a
00:00
Entzun
Kroketak: ohikoa den produktu hori dute nagusi Patxi Ruiz de Samaniegok eta Juan Gilek beren proiektuan. Tradizio eta ohitura gastronomikoak uztartuta, etxean betidanik egin izan diren errezetak dituzte gogoko, baina berrikuntza ukitu batekin. Horrela sortu zuten Kroketak.eus ere, eta, egun, sei kroketa mota dituzte, betiere zero kilometro filosofiarekin lan eginda, tokiko produktuekin eta ekoizleekin. Hasi berriak dira, baina badituzte zenbait erronka gerora begira ere: kroketak saltzeko eta dastatzeko aukera egongo den gune bat zabaldu nahi dute urtea amaitu baino lehen.

Martxoan jarri zuten martxan proiektua, nahiz eta ideia garatzen denbora gehiago aritu. «Juan eta biok aspalditik ezagutzen dugu elkar; 2017an elkartu, eta jakin genuen biok genuela aldaketa baterako gogoa, baina, azkenean, bide ezberdinak hartu genituen izurritea iritsi zenera arte, orduan erabaki baikenuen proiektuari ekitea», azaldu du Ruiz de Samaniegok. Hasieran, ekitaldi gastronomikoetan aritzea zuten helburu, Cooking Ohiturak sozietatearen bidez, eta, betiere, kroketak nagusi izanda. Hala ere, momentuko testuingurura egokitu, eta, lehen ideia hura atzean utzita, soilik produktua saltzen hastea erabaki zuten. «Egun, hiru lerro ditugu salmentetan: ostalaritza, komertzio txikiak eta partikularrak». Hain zuzen, online salmenta dute martxan.

Sei zapore ezberdin dituzten kroketak sortu dituzte azken hilabeteotan: urdaiazpikoa, txerriaren belarriak, txistorra, oilaskoa, gazta eta odolkia. «Zuzenean joaten gara ekoizleengana; haiekin bildu, eta proiektua aurkezten diegu, eta, gustuko baldin badute, kolaboratzen hasten gara». Ruiz de Samaniegok adierazi duenez, ekoizleekin «gustura» daude, eta «gertukoa» da harremana: «Zutaz kezkatzen dira, eta harremana positiboa da». Esate baterako, bexamela egiteko irina Kanpezukoa (Araba) da, eta kroketentzako ogi birrindua, Urretxukoa (Gipuzkoa) eta Aguraingoa (Araba). Horrez gainera, gainontzeko produktuak ere bertako ekoizleenak dira.

Produktuetan ez ezik, ekoizpen prozesuan ere badago kroketen sekretua. Proiektuko kideek makina bat erabiltzen dute bexamela egiteko, eta, orain arte, kroketak eskuz batu dituzte. Produkzioa handitu ahala, ordea, hori ez da bideragarria: «Kroketak batzeko makina bat ekarri dugu, oso artisaua dena; izan ere, hori zen guk bilatzen genuena: prozesua artisaua izatea eta kroketen bexamela ere fina izatea». Industrialek, esate baterako, ez dute halako emaitzarik. Ruiz de Samaniegoren arabera, masa oso gogorra izan behar da manipulatu ahal izateko, eta irin karga handia behar dute. Ondorioz, uste du emaitza ez litzatekeela izango haiek nahiko luketen modukoa.

Erronkak ere badituzte

Kroketak.eus-eko kideek zapore gehiago lantzeko asmoa dute. «Juan aritzen da batez ere esperimentazioan, buruan hainbat ideia dituelako; esaterako, orain, Zallako (Bizkaia) tipulen kroketak egitea pentsatzen ari gara», azaldu du Ruiz de Samaniegok.

Haien arabera, gero eta gehiago ari da zabaltzen beren proiektua, eta uste dute ahoz ahoko komunikazioa faktore garrantzitsua izan dela bide horretan, batez ere, herri txikietan: «Iristen gara produktuarekin, probatzen dute, gustatzen zaie, eta berehala zabaltzen da». Beraz, aurrera begira erronka berri bat dute buruan: kroketeria bat zabaldu nahi dute, betiere beren «txikitasunean eta apaltasunean».
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.