Noiz sortua: 2019-03-26 00:30:00

Motxila «gogoz eta indarrez» beteta Altsasun, aurrera egiten jarraitzeko

Antolatzaileek uste dute igandeko manifestazioak helburua bete zuela. «Eskertuta» eta «hunkituta» daude jasotako babesarekin eta elkartasunarekin
Milaka lagunek hartu zuten parte igandeko manifestazioan, Altsasun.
Milaka lagunek hartu zuten parte igandeko manifestazioan, Altsasun. JON URBE / FOKU Tamaina handiagoan ikusi

Gotzon Hermosilla -

2019ko martxoak 26

Aurreikustekoa zen handia izango zela, eta handia izan da. Baina joan den igandean Altsasun (Nafarroa) egindako mobilizazioak marka guztiak gainditu ditu. 60.000 lagun, antolatzaileek egindako neurketen arabera; ehun autobus baino gehiago, horietako asko Euskal Herritik kanpo antolatutakoak; manifestazioaren helburuekin bat egin duten 55 udalerri inguru; hamar kilometroko auto ilarak Altsasura iristeko; Altsasuko hiru sarrerak, kolapsaturik, eta inguruetan ezin aparkatu —egon zen autoa Bakaikun (Nafarroa) utzi eta Altsasuraino dauden hamar kilometroak oinez egin zituenik— eta abar. Indar hori guztia «motxilan» kargatu eta aurrera egiteko baliatuko dutela esan dute antolatzaileek.

«Eskertuta» eta «hunkituta» dira Altsasukoak Aske plataformako Aritz Leozek gehien errepikatzen dituen hitzak, zigortutako zortzi gazteen aldeko mobilizazioa gogora ekartzean: «Manifestazioak lortu zuen neurria, jendearen gertutasuna, berotasuna, benetan edonor hunkitzeko modukoak izan ziren. Oso eskertuta sentitzen gara».

Helburua «bete» zutelakoan dago Leoz: «Helburua zen berriro ere ikusaraztea jendea justizia eta askatasunen alde dagoela, eta hori lortu da: gizarte oso bat dago, epai honen kontra ez ezik, azken bolada honetan pairatzen ari garen eskubide murrizketen kontra ere». Bereziki, altsasuarren erantzuna nabarmendu du Leozek: «Herri osoa astebetez lanean ikustea ikaragarria izan da», esan du. Horren adierazgarri, datu bat: antolatzaileek kalkulatu zuten 150 lagun beharko zituztela lanean aritzeko, dena ondo irten zedin. Ikusita altsasuar askok bere burua eskaintzen zuela laguntzeko, kopuru hori 250era igo zuten. «Azkenean, 300 lagun agertu ziren igandean, lan egiteko prest».

Manifestazioan jasotako babesa «aurrera egiten jarraitzeko» erabiliko dute Altsasukoak Aske plataformakoek: «Jendeak argi izan dezala; motxila gogoz eta indarrez betetzeko balioko digu igandekoak. Gu ez gaude hemen urte baterako edo bi urterako, justizia egin arte baizik».

Espainiako Auzitegi Nazionalaren azken ebazpenaren aurrean, Auzitegi Gorenera jotzeko aukera badago, baina bide horrek luze joko du —urtebete gutxienez, plataforman kalkulatzen dutenez—. Bitartean, zigortutako zortzi gazteen auzia «nazioartera» eramaten jarraituko dute, eta mobilizazioa ere ez dute bazter utziko.

Parlamentuan ere bai

Manifestazioaren arrakastaren oihartzunak Nafarroako Parlamentura ere iritsi dira, eta han talde politiko guztiek eman dute horren inguruko iritzia. Aldaketaren aldeko indarrek herritarren jokabide «eredugarria» nabarmendu dute, eta «justizia» eskatu dute espetxeratuentzat. UPNk, PPk eta PSNk, berriz, kritikatu egin dute Nafarroako Gobernuak ordezkaritza bidali izana manifestaziora.

Geroa Baiko Koldo Martinezek esan du Altsasun «justizia eta neurritasuna» baino ez zutela eskatu, eta Altsasuko herritarren jokabidea «eredugarria» izan dela, «probokatzera joan diren buruzagi politikoena ez bezala». EH Bilduko Adolfo Araizen aburuz, «elkartasun olatua» gero eta handiagoa da, eta espetxeratuei ezarritako zigorra, «astakeria juridiko eta politikoa». Ahal Dugu-Orain Baiko eledun Laura Perezek, berriz, esan du Altsasuko kaleak «duintasunez eta elkartasunez» bete zirela.

UPNren Javier Esparzak, aldiz, salatu du Nafarroako Gobernuak «erasotzaileen alde» egin duela «erasoa pairatutakoak» defendatu beharrean. Antzeko argudioak erabili ditu PPko Javier Garciak, eta PSNko Maria Txibitek esan du «errespetatu» egiten duela herritarren manifestazio eskubidea, baina ez zaio gustatu gobernuaren bozeramaileak manifestazioan parte hartu izana.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan hamar lagun hil dira COVID-19 gaitzaren eraginez. Zortzi positibo atzeman dituzte PCR probekin, eta bost gaixo ospitaleratu dituzte. Euskal Herrian 29.491 gaixok eman dute positibo guztira, koronabirusa atzemateko probaren bat eginda. Horietatik 2.078 hil dira. Grafikoak, albiste barruan.

Aritxulegiko gaina, Nafarroa eta Gipuzkoa artean. ©

Nafarroako Gobernuak «jarrera zuhurra» du lurraldeen arteko joan-etorriekin

Berria

«Autonomia erkidego guztiek dute lurralde mugakideen artean mugitzeko helburu bera, baina litekeena da erritmoa berbera ez izatea», esan du Javier Remirez gobernuko bozeramaileak. Salvador Illa Espainiako Osasun ministroak atzo esan zuen hirugarren fasea bukatu arte ezingo dela autonomia erkidego batetik bestera bidaiatu. 

Heriotza kopurua asteka, Araban, Bizkaian eta Gipuzkoan. ©INE

Nabarmen goratu da izurriak eragindako heriotzen kurba

Edu Lartzanguren

Espainiako Estatistika Institutuak grafiko bat argitaratu du, erakusteko izurriak nola eragin duen heriotza tasan.

Pedro Sanchez Espainiako presidentea, gaurko lehen agerraldian, Kongresuan. ©J. J. Guillen / EFE

Espainiako Kongresuak larrialdi egoeraren seigarren luzapena onartuko du gaur

Paulo Ostolaza

Ekainaren 21 arte luzatuko dute; printzipioz, azken aldiz. Sanchezek iragarri duenez, «hirugarren fasean sartzen diren autonomia erkidegoetan hango presidenteak erabakiko du nolakoa izango den fase hori».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna