Albistea entzun

Euriteek arazo ugari eragin dituzte, baina ez abenduan bezainbeste

Hainbat errepide itxi dituzte urak gainezka egin duelako eta luiziak izan direlako. Nafarroan larrialdi aurreko egoera ezarri dute, eta Ipar Euskal Herrian, alerta gorria. Bideoa, albistearen barruan.

Arga ibaia indar handiz jaisten, Burlatan.
Arga ibaia indar handiz jaisten, Burlatan. IÑIGO URIZ / FOKU Tamaina handiagoan ikusi

Joxerra Senar -

2022ko urtarrilak 11 - Iruñea

Berriro ere zeruari eta ibaiei begira. Azken 48 orduetako euriteen ondorioz, Euskal Herriko isurialde atlantikoko hainbat ibaik eta Argak gainezka egin zuten atzo. Hala ere, uraren maila eta isuria ez zen heldu abenduaren 10ekoaren parera, eta, horren ondorioz, kalteak ez ziren hain handiak izan. Dena den, igande gauetik hasita urak gainezka egin zuelako, hainbat errepide itxi behar izan zituzten: hala nola Bergaran (Gipuzkoa); Iruñean, Landabenen; Sakanan, Arruazun eta Arbizun; Irurtzun eta Astrain artean; Endarlatsan, Ultzaman, Iraizotz eta Larraintzar artean (Nafarroa); Uztaritzen (Lapurdi); Bidaxunen eta Labetze-Bizkaikoan (Nafarroa Beherea) eta Barkoxen (Zuberoa).

Duela hilabete inguru gertatutakoa gogoan, Nafarroako Gobernuak larrialdi aurreko egoera izendatu zuen. Halaber, Ultzamaren eta Argaren emari handiaren aurrean, bezperan autoak ibai ondoko tokietatik erretiratzeko agindua eman zieten herritarrei Atarrabiako, Uharteko, Burlatako eta Iruñeko udalek. Goizean heldu zen Arga punturik gorenera, 2,5 metroko maila eta segundoko 300 metro kubikoko isuria lortuta; abendukoaren aldean, %40 gutxiago. Hegoalderago, Etxaurin, ibaia ateratzea espero zen, baina, azkenean, ez zuen gainezka egin.

Eraikin bat hustu dute Beran

Arratsaldean, eraikin bat hustu behar izan zuten Beran, eta 24 familia etxebizitzetatik atera zituzten, errekak gainezka egin zuelako. Funesen ere kezka handia zegoen: aurreko uholdeak kalte handia eragin zuen herrian, batik bat ibai ondoko auzoan, eta uholdeei aurre egiteko egiturak oraindik ez dituzte konpondu. Ebroko ur konfederazioak iragarri zuen goraldia «ezohikoa» izango zela, 900 metro kubiko segundokoa. Goia 19:30ean jo zuen.

Beste kezka iturria Zaraitzu eta Eska ibaiak izan ziren. Izan ere, azken egunetako euriteei, Pirinioetako elurraren urtzea gehitzen zaie ibaiotan. Hegoalderago, Ebro ibaian, ez zen «arazo handirik» espero, gobernuaren arabera. Tuteran prest daude zer gertatuko, baina aurreikuspenek diote ohiko tokietan geratuko dela ura.

Maria Txibite Nafarroako Gobernuko lehendakaria Teresa Ribera Espainiako Gobernuko Trantsizio Ekologikoko ministroarekin Funesera joatekoa zen goizean, abenduko uholdeen ondorioez hitz egiteko, baina bidaia atzeratu zuten atzoko egoera aztertzeko: «Baldintzak ez dira abenduko berak». Duela hilabete bateko uholdeei dagokionez, 133 udali eta orotara 10.000 hektareari kalte egin ziela zehaztu zuen.

Igande arratsaldetik Pirinio Atlantikoko prefeturak alerta gorria ezarri zuen Ipar Euskal Herri osoan, eta atzo gauera arte eutsi zion egoera horri. Euriteei elurraren urtzea gehitu zitzaion, eta Uhaitza erreka indar handiz jaitsi zen Zuberoan barrena. Atharratze inguruan arrisku maila handia zen, prefeturaren erranetan. Haurrak eskolara ez eramateko eskatu zieten gurasoei, eta eskola garraioa ezeztatzea deliberatu zuen. Nafarroa Beherean, Errobik Banka eta Baigorri artean, eta Biduzek Akamarre eta Bidaxune artean arazoak sortu zituzten, eta errepideak itxi egin behar izan zituzten.

Lapurdin, Senperen, hainbat etxe argindarrik gabe geratu ziren. Egun osoan Aturri ibaiak ur emari eta maila handiak izan zituen, eta prefeturak espero zuen arratsalde erdialdean gainezka egitea. Inguruko aparkalekuak itxi ziren, eta Baionatik Peyrehoraderako tren zerbitzua moztu egin zen egun osoz.

Uholdeez harago, euriteek Bizkaian eta Gipuzkoan luiziak eragin zituzten, eta hainbat errepide itxi ziren: Trabakuako mendatea egun osoz; Bergaran, N-626 itxi egin zen, eta gauza bera gertatu zen GI-627an, Leintz-Gatzagan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskara aurrera, milaka lagun Donostian euskararen alde

Milaka lagunek Donostiako kaleak hartu dituzte euskararen alde

Julen Aperribai

Ohikoan baino nabarmen handiagoa izan da gazteen presentzia, manifestazioan zein aldarrikapenetan. Euskal Herrian euskaraz bizitzeko dauden oztopoengatik «kezka» agertu dute antolatzaileek

Plaka, kenduta, Donostiako Gaskonia plazan. ©Joseba Alvarez

Txillardegi omentzeko plaka kendu dute Donostiako Gaskonia plazatik

Berria

Txillardegi Plaza zioen plakak hiru urte zeramatzan jarrita, 2019an Txillardegi Liburutegia ekimenak jarri zuenetik.

 ©JON URBE / FOKU

«Feminismoaren zati batek amatasunaren biologia ukatu du»

Maddi Ane Txoperena Iribarren

Lagoma Pombarrek eta Fernandez Maritxalarrek 11 amaren eta bi aitaren bizipenak bildu dituzte 'M ama* eme* ume*' liburuan. Uste dute guziek «arrakalatzen» dituztela amatasunaren instituzioak «inposatutako» ereduak.
UEUko zuzendariak omendu zituzten, UEUko kide guziei emandako omenaldi gisa. ©BOB EDME

Euskal unibertsitatea obretan, baina irekia

Ekhi Erremundegi Beloki

Udako Euskal Unibertsitateen 50. urteurrena ospatu dute Miarritzen, aurtengo ikastaroei hasiera emateko ekitaldian. Urteetan UEU egin dutenak omentzeko eta etorkizunerako erronkez mintzatzeko aukera izan da.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.