Noiz sortua: 2019-03-21 00:30:00

Abertzaletasunari «harresia» jarri nahi dio Navarra Sumak

Hautagaiak aurkeztu ditu: Sergio Sayas (UPN) izango da Espainiako Kongresurako zerrendaburua, eta Ruth Goñi (C's) Senaturakoa. «Apustu ausart, tinko eta sendoa da»
Navarra Suma koalizioko zerrendaburuak, atzo, Iruñean egindako aurkezpenean.
Navarra Suma koalizioko zerrendaburuak, atzo, Iruñean egindako aurkezpenean. BERRIA Tamaina handiagoan ikusi

Gotzon Hermosilla -

2019ko martxoak 21

UPNk, PPk eta Ciudadanosek osatutako Navarra Suma koalizioak bere hautagaiak aurkeztu ditu Espainiako Kongresurako eta Senaturako. Eta hautagaiekin batera, helburuak ere finkatu ditu: «Abertzaletasunaren aurrerakadaren aurrean harresi» izatea, eta «bere nortasuna errespetarazi nahi duen Nafarroaren ahotsa» Espainiako instituzioetara eramatea.

Sergio Sayas UPNren foru parlamentaria izango da Kongresurako zerrendaburua. Horren gibelean, koalizioa sustatzen duten hiru alderdien ordezkariak azalduko dira: Carlos Garcia Adanero (UPN), Cristina Sanz (PP), Sonia Perez (C's) eta Alberto Picon (PP).

Senaturako zerrendan, berriz, Ciudadanos alderdiko kide bati dagokio lehenengo postuan joatea, eta alderdiaren Nafarroako antolakuntza idazkari Ruth Goñi izango da zerrendaburua. Ondoren, Alberto Catalan (UPN) eta Amelia Salanueva(PP) joango dira.

Hautagaiak ez ezik, koalizioak erabiliko duen logotipoa ere aurkeztu dute ekitaldian: laukizuzen moduko bat, gorria, UPNren ikurrean agertzen denaren oso antzekoa, eta barruan NA+ idatzirik duena.

Sayasen ustez, Navarra Suma «ilusioa eta ziurtasuna» sortzen duen egitasmoa da «Nafarroarentzat zein Espainiarentzat», eta «itxaropena» eskaini nahi die «Uxue Barkosen gobernua gehiago jasaten ez duten herritarrei».

Halaber, «askatasuna berreskuratu» nahi du Navarra Sumak, Sayasen hitzetan. «Pentsatzeko modu bat inposatu nahi izan digute, eta pentsatzeko modu horren arabera bizi behar izatea ere bai», esan du. Abertzaletasuna «sektario, endogamiko eta itxitzat» jo du.

Berriro ere, Espainiako konstituziotik laugarren xedapen iragankorra kentzeko asmoa agertu du, hura «nafarrentzako tranpa» eta «abertzaleei egindako kontzesioa» delakoan.

Senaturako zerrendaburuak ere hitz egin du. Ruth Goñik eskerrak eman dizkie Ciudadanos osatzen duten kide guztiei, eta esan du koalizioa eratzeko hautua «apustu ausart, tinko eta sendoa» dela. «Batzen gaituena balioetsi eta desberdintasunak albo batera utzi ditugu, helburu bakar batekin: boto konstituzionalista guztiak bildu, Nafarroan agindu eta abertzaletasuna gobernutik kanpo uztea», azaldu du.

Goñiren ustez, Nafarroak ezin ditu beste lau urtez «identitatean oinarritutako politikak, bazterketa eta inposizioa» jasan. Horregatik, «oso desberdinak diren alderdiek» erabaki dute «indarrak batzea».

Ciudadanoseko ordezkariaren ustez, beharrezkoa da «espainiarrak batzearen alde lan egingo duen proiektu politiko bat», eta, aldi berean, «batasuna, berdintasuna eta askatasuna» defendatuko dituena «inolako konplexurik gabe».

Goñiren arabera, Nafarroa lehen «liderra» zen «Espainiaren aurrerabide sozial eta ekonomikoan», eta hara itzuli nahi dute, «lehen geundeneko tokira, inoiz utzi behar ez genuena».

Hautagaiekin batera, koalizioa osatzen duten hiru alderdien buruak ere egon dira aurkezpenean: Javier Esparza (UPN), Ana Beltran (PP) eta Carlos Perez Nievas (C's). Esparzak esan duenez, koalizioa osatu izanak «ilusio handia» piztu du; haren ustez, «pozik eta harro» egoteko arrazoiak badituzte hori lortzeko lanean ibili direnek. Haien helburua da «Nafarroak foru erkidego bereizia, espainiarra eta europarra izaten jarrai dezala» nahi duten nafar guztiak biltzea.

PPren zerrendak, «aurki»

Araban, Bizkaian eta Gipuzkoan PPk oraindik ez ditu Espainiako Gorteetarako zerrendak itxi, eta, askoren ustez, alderdian hautagaiak aukeratzeko prozesuaz dauden desadostasunen erakusgarri litzateke hori. Espainiako PPren komunikazio arduradun Marta Gonzalezek, aldiz, esan du zerrendak «aurki» egongo direla, eta ez du uste alderdiko kideen artean «ezinegonik» dagoenik horren inguruan. «Prozesu hauek beti dira zailak, pertsona batzuk aukeratu behar direlako, eta beste batzuk, berriz, kanpoan utzi».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 28an eguneratua, 18:00etan. ©BERRIA

Koronabirusaren azken datuak

Berria

Azkeneko 24 orduetan hiru pertsona hil dira COVID-19 gaitzaren eraginez, 23 positibo atzeman dituzte PCR probekin, eta sei gaixo ospitaleratu dituzte. Euskal Herrian 28.976 gaixok eman dute positibo guztira, koronabirusa atzemateko probaren bat eginda. Horietatik 2.037 hil dira. Grafikoak, albiste barruan.

Aitor Esteban, Espainiako Kongresuan. ©Ballesteros / EFE

EAJk Madrili eskatuko dio malgutzeko hirugarren fasea

Berria

Hurrengo fasearen inguruko erabakiak autonomia erkidegoek hartu beharko lituzketela azpimarratu du EAJren Espainiako Kongresuko bozeramaile Aitor Estebanek. Haren ustez, alarma egoera berriz luzatzea onartuz gero, azken aldia izan beharko luke: «Ezin da gehiago luzatu».

Mari Luz Esteban eta Elixabete Garmendia. / ©GORKA RUBIO, FOKU

«Zahartzaroari ematen zaion tratamenduaren metafora da gertatu dena»

Maider Galardi F. Agirre

Koronabirusaren krisia piztu denetik, maiz hitz egin da adinekoen zaurgarritasunari buruz, eta, oraindik, kalera irteteko mugak dituzte adinekoek. Mari Luz Esteban antropologoak eta Elixabete Garmendia kazetariak, ordea, salatu dute adinkeria dagoela, eta beharrezkoa dela nagusiagoei ahots propioa ematea.

Espainiako poliziak, Lapurdi eta Nafarroa arteko mugan. ©JAGOBA MANTEROLA/ FOKU

Mugako baldintzak malgutzeko eskatu dute Urkulluk eta Roussetek

Ekhi Erremundegi Beloki

Gutun bat bidali diete Frantziako eta Espainiako gobernuei, «euroeskualdean mugaz gaindiko joan-etorriak zabaltzeko»

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna